كلام الرتينة بِت سالم في حِنَة على الشَاشُوق

وكان في الحِلة يوم حِنَّة علي الشاشوق
مشينا نَقَّدِّم البنوت علي ضو الرتاين
عيونـهِن هارجة تنبح في الفجُر والليل ،قريب واقِف يعاين
خِدوتِّن واجّة زي جهر الكهارب الفي المداين
وكان الليل وما في الحلة من الحفلة ، إلا صداها
كان زغرودة .. كان غَناي
رقيص الشامة بت حمدين .. وعَرضة حامِد العولاق
وشكلة عامر المسكين ..
وخَت الحِنَّة لي يات من حضور ضفرين ..
ونمات العَديل والزَين ..
وشَنَّق ود سعَد طاقيتو، شان في الحلة سو كِنْتِين
وعيّط ود مجمر زين ..
عشان الزيِنَة رقصَت زين !!
وفي الشَعَقيَبا كان بازْمالو شبالين
وسهرة وين .. وبَهرة وين .. وجهرة وين .. وسَكْرة وين

أقول آبنية : ليش ما تهِمي فوق زولاً مشَلْهَت فوق دريبك
لا النفَّس مجبود .. و لا لِحِق الغزالة !!
وقَفَتْ .. وانبهط رمَّاشَـة .. جدعت بالبَسِم رشَّاشَة
يالمهجوم: يهجمك الله كان داير تسيلي الخُلعة ، قالت
والعيون ضاحكة .. في ضو الرتين بَشَّاشَة
عاد من حيني جاتني الحالة ..
قُلتَلا: لا لا ، حات النِعمة يا بنية البِريد ...
في الريدة .. ما بخبر فسالة ..
حدرَتْ باسمة ، قُلْتَلا: عايني
تسلم عينِك، إلا حقيقة مو ساهل كِتالا
حلفَتْ ناضرة ، حالفابو الصباح الباش يلوِّن في المشارق
والنسايم الجاية من تالانا تالا ..
حات أُمي البعِزها زي تراب حِلتنا .. ببقى حِداكَ يالمريودْ
وأقول لي هلنا ناس قِدام :-
و في ها الحالة مي شينة القُوالة .
و اساعْل القمرة في شانِك ..
و اقولَّها: هيلا يالقمرة، وتانية وهيلا يالقمرة ، و تالته وهيلا يالقمرة
ودحين ساكِن رويشات القليب في الحِلة ما رشا المقَالة ؟
وحات الفَرحة في ها الليل ،
بشوفِك فيكِ عز ابواتي ،
ضرعاتك خُدُر يالباهي ، ما دايرالي من غيرك كفالة

وجاتني النهمة ، قُلتلا :
اقيفي يالمريودة، داير ارميلي مرباعين
وتبقي حمالتي عن سيد الحمالة !!
قالت: والفجر في خديتّا
يالممسوخ .. ويالمسخوت .. حِدانا العين !!
بعد ما تسدر الضحوية ،خُت الفاس على كتفك
و بوجِح غادي ، بوبِح غادي ، نِم فوق البِعَجْبَك زين ..
قُلتَلا : زين ..
وداك الحين .. بشوفِك يالرَتينة مع الشمس بِتْلالي
من ناك للسحاب الـ كابِّي فوق حِلتنا
كان عامِل ضلالا
و بشوفِك في عوينات الصِبَيِّن ....
والعِشِق لصَّف ضياهِن .. والنهار وصَّف خُطاهِن
والصبُر .. زارعِنُّو فوق ضهر البيادِر،
فوق كتافين السقالة ...
بَريد ريدِك سماح أهلي ..و بَريد ريدِك كِفاح أهلي
و بَريد مهواك ... و اريد انسانِك الجواك
و اريدِك و الله زي آخر الحتالة ..
وادوبيلك .. أشيلِك غُنْوة لِلسمحات .. و انِمِك في تراتيلي .. وأدوبيلك
وكُل ما العتمة تَنْـزِل سابلة ..أنسى عَناي
أتاوق لي قناديلك .. واشد حيلي ... و أدوبيلك
إذا مغناي بِبَرِّد في الحشا صبرك
و يرَجِّع لي تهاليلي .. بدوبيلك
و لو الشوق عرف بَكَّاكِ أطْرِي غُناي .. أطْرِي غُناي .....
عليكِ العِزة يالمريودة .. دوبيلي
و عليكِ العِزة يالمريودة ... دوبيلي


محمد طه القدال