عيال اخر زمن

ؤيد ود مواهب ولد في الصف التاني اساس
طلع من باب بيتهم نادتو حنان مرت بابكر
ياااااااااا مؤؤؤؤؤؤيد
طنطن في سرو ومشي ليها
مدت ليو ورقة ام الفين وقالت ليو
عليك الله يا مؤيد جيب لي رطل زيت من دكان محمد ابو طويلة سريع حلتي في النار
اجري مؤيد في زهنه مقارنة سريعة بين سعر رطل الزيت والمبلغ فوجد الحسبة مظبوطة ووافق في الحال
اخذ المبلغ وانصرف مهرولا نحو دكان محمد ابو طويلة بينما بدأت حنان في المناداة من خلف الباب علي جارتها المقابلة لها
يا اخلااااااص اخلاااااص
ردت اخلاص اهلا يا حنان اصبحتي كيف
كويسين الحمد لله
حالتي قلتا الليلة اقوم بدري اغسل قبال الكهربا تقطع
بس وصلت الغسالة كدي قطعت
يقطع رقبتهم اصلو ياهو حالهم
دار اقول ليك شنو؟
كلمي معاك فاطنة وعلوية قولي ليهم الليلة الجبنة عند عطيات
عطيات ولا نعمات؟
لالا يادي نعمات قالت ولدا عيان وادهو المستشفي
سلامتو مالو؟
قالت الازمة قامت عليو
في هذه الاثناء حضر مؤيد يحمل في يده الزيت
اها ياخالتي حنان ماجيتك سريع؟
سريع يعلم الله
استدار مؤيد هاما بالانصراف
صاحت حنان
مؤييييد
رطل الزيت بي كم؟
بي 1500
والخمسمية وينها؟
استدرك قائلا هييييييي
ثم ادخل يده في جيب البنطلون المخروم
تتصوري الجيب مقدود بتكون وقعت!!!!
وقعت؟انت يايمة تتجازي غلطانة انا البرسلك انت
مر مؤيد بالقرب مني القي علئ التحية سالته بخبث شنو يا مؤيد المراة دي مالها معاك؟
انت عارف نسوان الحلة دي كلهم ما نافعات مفروض يعبوهم في شوالات ويرفعوهم في عربية الوسخ
نسوان الحلة خليهن حنان دي مالها معاك؟
ياخ دي بس تفلح تقول ليك يا مؤيد جيب لي زيت من ابو طويلة حنكتها خمسمية شبكتني تتجازي وبكرة تمشي تونس بي نسوان الجبنة
قلت ليو يعني الخمسمية ما وقعت حنكتها؟
اخرج من كمر البنطلون خمسمية حديد قذفها في الهواء باصبعه الابهام ثم التقطها بحركة بهلوانية قائلا
ياصاحبي البلد دي كان بقيت فيها مسكين ياكلو حقك اونطة


ودمتم سالمين

الولد دا زمان انا مش اتنبأت ليهو بمستقبل مشرق ...