حلمنتيش ..الحب والفيزياء

shoosh الأحد يونيو 28 2009, 12:54

الحقيقة انا ماعارف مين الشاعر بس ممكوون و رهيب ولا شنو؟

كسير علمي
من كم دور ومن كم يوم .. انا العيني جفاها النوم
شحنة قلبي بالكولوم.. اقاوم في السهر بالاوم
شدة ريدي بالامبير.. فرق جهدك علي كتير
بعد همسات حنان الحب.. بقت شحناتي بالتاثير
ادور في بعدك البؤري وزي ماجارت الايام.. علي جوري
اشعة طيفك الحالم تكسر جوووه منشوري
وياسمحة بنات الحي.. عدسات عينك الامة تزيد من جازبيتك لي
ويفوق حد منحناها الكي..
وياصلاح رجال الفيزياء شدو الحيل.. قوتكم تكون بالحيل
وشحناتكم تكون بالميل ودعواتكم تجينا عدييل
يا اسحق وياداين.. قوتكم تكون دافعة وخوتكم تكون نافعة
ياامبير وياناس جول.. انا الولهان انا المكتول.. وفاقت طاقتي الفين جول
وحرارتي الكامنة للتصعيد.. مابيه تزول
وياهايجنز موجاتك تكون في العون.. ودافينشي يجر في سبحتو بالفوتون
وياجاليليو بي منظارك الموزون
وعيدكم جملة يالصلاح.. تلمو شملنا في ثانية
واشوف السمحة متفانية...اناجيك واناديك
وشايل الكمرة في يدي.. عشان ما التقط صورة
اقيفي موازية لي قلبي.. ونفسي بيك مبهورة
رجاي ماتقيفي في البؤرة .. عشان صورتك تكون واقع وما تكون لي خيالية
وعلي محور رموش عينيك.. وقفة تكون عمودية
اوجه ليك عدسات ريدة كروية
وفي محور تكور حبنا الازلي.. تكون صورتك حقيقية
اسال ربي يالسمحة نعيش ايام اريحية
واقطاب ريدنا تتجازب.. بي وحدات مغنطيسية
ومنشور حبنا الزاهي.. ننشر بيهو احلام طيفنا وردية
نحلل طيفنا بي بسمات وبي نظرات جسيمية
وتبدو البسمة في شفتيك.. دقائق وردة مادية
شراع الحب يدور بينا .. على جبهات عمودية
نعيش الفرحة ننسى الناس.. مع الحركة الجزيئية
تكون كلماتنا بالفوتون واشعاعاتنا بالنايون
وعزم القوة لينا عيون..
الوان طيفنا الفين لون..
اخطف الكتروناتك واهدي ليك انا بروتون..
نعيش في ذرة متعادلة..
ننسى الدنيا ..
ننسي الناس....
وننسي الكون ...

onatee الأحد يونيو 28 2009, 13:32

هههههههههههههههه حلوة شديد يااشرف

بشير كمبال الأحد يونيو 28 2009, 14:20

تشكر ياأشرف .. الحب ده حاجه غريبه ,, ناس الكيمياء كتبو بلغتهم
وناس الاحياء كذلك والليله اشرف جاب لينا كلام ناس الفيزياء
بالتأكيد اصحاب علم الاتقتصاد والجغرافيا والتاريخ
لهم ابداع في هذا الموضوع لم يصلنا لكنه موجود
.. حاجه تحير ..

shoosh الأحد يونيو 28 2009, 16:20

شكرا يارانيا (سك...) عل المرور..

يابشير (الحب بتعريف مسطول :اكولة في القلب يصعب حكها) عاوزين بتاعة الكيمياء دي .. اتحفنا..

بعدين ترقبو قصيدة حلمنتيشية اتكتبت في الدفعة الاولي في ماسبيو..دي خطيرة..(فت شديد)

ترقبو!!!!!!!!!!!!!!

حلمنتيش ..الحب والفيزياء

حلمنتيش ..الحب والفيزياء

رد: حلمنتيش ..الحب والفيزياء

رد: حلمنتيش ..الحب والفيزياء

رد: حلمنتيش ..الحب والفيزياء