أخيرا وارغـــــــــــــــــــــــــــــــــو سجل هدف

* اخيرا وفي الاسبوع (التاسع) للدوري الممتاز .. وارغو جاب ليه (قون) في الاتحاد ... قالوا (القون) جابو بعد ما اتحرك بيه من منتصف الملعب.
* والله يا وارغو (قونك) دا لو اتحركت بيه من (الحدود الشرقية) ما بحلل ليك الخمسة مليون دولار قيمة تسجيلك في المريخ.
* انت بتلعب علي منو؟.
* الحركات دي ما بتمشي علينا نحن ... تصور نحن الهلالاب القدامك ديل ..(افياني) جاب ليه (قون) في اينمبا.. هدف يتمتع بكل المزايا والخواص النادرة مع ذلك (شطبناه).
* الغريبة هدف (افياني) كان فى البطولة الافريقية ..يعني ما في الاسبوع التاسع للدوري الممتاز.
* وهدف افياني كان هدفا سجله في اخر ثواني من عمر المباراة .. وفوق هذا كله .. هدف افياني كان هدف (انتصار) ... ما زي هدفك (الميت) دا.
* غايتو يا (حسن محجوب) الهدف دا .. لو ما شفتو من (نص الملعب) .. كنت قلت ليكم (اوف صايد).
* اهدافنا كلها .. انت وابوشيبة مطلعنها لينا (تسلل).
* وفي التسلل .. بقولوا ليك تسلل (واضح).
* واروغو عرفها.
* الطريف في الامر والحديث عن (الشبه) بين هدف افياني وهدف واروغو .. ان افياني (فرح) فرح شديد .. متل فرحتك دي يا وارغو .. وقلع (الفانلة) برضو ... يعني انت باختصار كدا ماشي في طريق افياني ذاتو.
* نحن الوقت داك اطلقنا علي افياني (هداف الثواني).
* هداف ثواني مين يا عم؟.
* تتخيلوا افياني الما عاجبكم دا في (المريخ) جاب ليه قون.
* السنة القادمة احتمال كبير يا وارغو تمشي تلعب في الاهلي الليبي.
* بس ان شاءالله (تتأقلم) في ليبيا.
* يا بتوع (التأقلم) انتوا.
* هدف وارغو دا ذكرني قصة زمان ...
* قالوا ليك زمان كدا كان في واحد اسمو (عبسنجي).
* عبسنجي دا طلع لينا من وين كمان في (البرد) دا؟.
* قالوا ليك عبسنجي دا عندو زوجتي عاوزة توضع .. ساقها وداها المستشفي وجاء راجع .. عشان الهلال كان عندو مباراة في البطولة الافريقية مع اينمبا.. خلي معاه اخوه يتابع معاهم وقال ليه لو حصل ليكم اي حاجة اضرب لي.
* عبسنجي دا اثناء رجوعه للبيت اخوه ضرب ليه.. وقال ليه (مبروك).
* عبسنجي قال ليه : اها ولد وإلا بنت؟.
* اخوه قال ليه .. لا ولد لا بنت.
* طيب شنو؟.
* (قون).
* الهلال جاب ليه (قون).
* اخوه طلع هلالابي اكتر منو.
* الحكاية دي برضو بتذكرني بي الزول البكون مقطوع في المستشفي اسبوع كامل .. يتابع في الفحص والاجراءات مع زوجتو .. وينزل من دكتور لي دكتور.
* اها الزول دا وقت زوجتو تكون عازوة توضع .. وتمشي وتقول ليه : انت عاوز ولد وإلا بنت؟.
* بقول ليك : (البجيبو الله كلو كويس .. بس الله يحلنا بالسلامة).
* ناس المريخ كانوا بس عاوزين وارغو يجيب ليه هدف .. وتاني اي حاجة بتهون.
* وبعيدا عن هذا .. بل قريبا منه قرأت في احد القصص القصيرة ما ينتهي الي هذا المحتوي.
* قالوا ليك .. زول عندو زوجتو في حالة وضوع ... مشي بيها علي مستشفي حكومي.
* الدكتور شاف الحالة .. قرر اجراء عملية (فورية) للولادة... في دكاترة بقولوا ليك عملية (مستعجلة) عشان يطيرو قلب المرافق.
* مستعجلة دي .. هسع في داعي ليها.
* مستعجلة في عينك.
* الزوجة دخلت (غرفة العمليات) .. وزوجها بقي زي نظام المسلسات يمشي ويجي .. يقيف ويقعد وكل ما يطلع زول من غرفة العمليات يجري ليه يقول ليه: ان شاءالله خير يادكتور.
* لو طلع ممرض بقول ليه يا دكتور.
* اها صاحبنا دا في وقفتو الطويلة دي جاءه الدكتور وقال ليه : زوجتك دي ح توضع توأم... لكن بتواجهنا بعض الصعوبات .. (مسلسل تركي بس).
* الصعوبات دي بتعجبك في المسلسلات التركية.
* الدكتور غاب ساعة كدا وتاني رجع وقال ليه : اسمع نحن من اجل انقاذ حياة احد التوأم .. ح نضحي بحياة واحد فيهم.
* الزوج قال ليه : ما في مشكلة وقت احد التوأم ح يطلع سليم وح يعيش ممكن نضحي بي واحد.
* الدكتور مشي قعد ليه ساعة .. وتاني جاء راجع للزوج .. وقال ليه : نحن عشان حياة (الام) وسلامتها .. ح نضحي بي حياة (الجنين) التاني من اجل سلامة (الام).
* انتوا ما سمعتوا الفنان بغني (تسلم الام الجابتها).
* الزوج قال ليه : ما مشكلة سلامة (الام ).. اهم من (الجنين).
* اها الدكتور بعد ساعة تاني جاء علي الزوج وقال ليه : اسمع يا ابوالشباب .. نحن عشان سلامة (الاب) ح نضحي بـ (الام).
* الام عيشتها تطير... الاب الدخلو شنو هسع.
* الزوج وقت الموضوع هبشو .. قال ليه يا دكتور سلامة (الاب) عندنا اهم حاجة .. ما مشكلة ضحي بـ (الام).
* الدكتور مشي غاب ليه ساعة وجاء .. الزوج وقت شافو من بعيد (اتخارج) .. وقال الدكتور الما مضمون دا يقوم يقول لي عاوز اضحي بـ (الاب) .. عشان سلامة (الوطن).
* احسن نتخارج .. ونتعوض الله ساكت.
* اها المريخاب ديل هسع ضحوا بي اي حاجة .. عشان هدف وارغو.
* قعدوا طمبل احتياطي .. عشان ما يزاحمو .. وقعدوا العجب في الكنبة .. عشان ما يفكر هو في الهدف .. وطلعوا السعودي من القائمة .. عشان وارغو يأخذ راحتو علي الاخر.
* جنس تضحيات.
* دا غير الخمسة مليون دولار .. والعشرين مليون الراتب الشهري.
* البلد كلها ضحت من اجل وارغو.
* وكمان بعد دا كلو قال ما قادر (يتأقلم).
* ناس المريخ ديل عملوا ليهم (مهرجان) عندما دشنوا العمل في الطابق التاني وقبل ذلك عملوا ليهم (مهرجان) عندما كان الطابق الثاني (حلم) في الخيال وعملوا ليهم (مهرجان) بعد انتهاء المرحلة الاولي من الطابق التاني .. وعملوا ليهم (مهرجان) في افتتاح الطابق الثاني (شخصيا) .. وعملوا ليهم (مهرجان) للوحة الالكترونية .. وعملوا ليهم (مهرجان) لسور الاستاد .. وعملوا ليهم (مهرجان) للاضاءة .. وعملوا ليهم (مهرجان) للنجيلة .. وعملوا ليهم (مهرجان) للكراسي .. يوم اتحركت (مهرجان) .. ويوم وصلت بورتسودان (مهرجان).. ويوم وصلت الخرطوم (مهرجان) ويوم ركبوها (مهرجان).
* اها رأيكم شنو يا مريخاب تعملوا ليكم (مهرجان) لي هدف وارغو في الاتحاد.
* وممكن قبل الهدف دا تعملوا ليكم (مهرجان) لهدف واروغو في (الشجرة).
* اصلو ناس المريخ مرة جابوا برشلونة .. ومرة ميلان .. ومرة الاهلي المصري .. كلهم ديل لعبوا معاهم في الرد كاسل.
* دا غير (كاظم الساهر).
* ملحوظة: الهلال ذاتو بقي يلعب في الرد كاسل .. بختكم

ود عبد الماجد
.................................................................................................