كان نفسى اقولك من زمان

كان نفسى اقولك من زمان


كان نفسى اقولك من زمان
بالكاتمو فى سرى
ومكَّتمْ فى حشاى.. مدسوس سنين
كان نفسى اقولك من زمان
بالشايلو فى عينى معزة
وفى القلب ريدا بخاف الغربة
والشوق والحنين
زاملنى زى خاطر الفرح
وكتين يقاسم الهم عزا
وكتين مدامعى تكون جزا
تفتح مباهج الليل ظنون
كان نفسى اقولك من زمان
سطوة محاسنك عندى ماكسرة جفون
وكت العيون تعبرنى زى خاطر المسا
سطوة محاسنِك ما الرخام الفى الحرير
وكت الثغير يفجعنى بى حرفاً قِسى
سطوة محاسنِك عندى وكتين كبريائِك
ينهزم لى طيبتى بى لفظة حنان
وكتين مشاعرِك تنسجم فى عمرى
تنفح قلبى بى رعشة أمان
سطوة محاسنك عندى وكتين شوقى
يصبح فى هواك
ليل عزة ما بتعرف هوان
كان نفسى اقولك من زمان
عينيك وحاتك غربتى وأهلى وبلادى
الفيها ضايع لي زمن
عينيك وحاتك شوقى لى زولاً ولوف
من بعدو ساب عينى سهن
وانا الكنت داير من زمان
أشرح حكايتى معاك الف
احكيك وازيد القول ولف
واتمنى لو قلبك عرف
كان من زمان
من قبل مافى قلبى يتحكر
زمان الحرقة فى جرح الأسى
من قبل ما حرف الحقيقة الحلوة يتبدل عسى
ويصبح أمانى كسيره فى خاطر الحنان
كان نفسى اقولك من زمان


أجمل الأبيات من وجهتي نظري :-

سطوة محاسنك عندى ماكسرة جفون
وكت العيون تعبرنى زى خاطر المسا
سطوة محاسنِك ما الرخام الفى الحرير
وكت الثغير يفجعنى بى حرفاً قِسى
سطوة محاسنِك عندى وكتين كبريائِك
ينهزم لى طيبتى بى لفظة حنان

فيها رسالة جميلة جدا لكل من الطرفين
الطبية وحنان في المقابل انهزام الكبرياء " إذن هذا هو السر "

قصيده رائعه والاروع استخلاصك للمعني الجميل

شكر ياتينه .. يظل الرائع مصطفي سيد احمد رقما صعبا وقمة باقيه في سماء الفن والغناء السوداني .. اغنيه رائعه الكل يدندن بها .. ولا امل سماعها اطلاقا ..