الكرسى الساخن(2 ) مع مدير الموقع بشير كمبال

في البدايه شكرا كتير يامحمد علي كلامك الجميل في حقي ومااظن انا بستاهل ده كلو .. وطبعا ورطتني في الموضوع ده وح اقعد ليك في كرسيك ده علي مضض ، لانو ده ماكان اتفاقنا ..فكرة الموضوع حلوه وبتعرف الواحد للناس اكتر .. عشان كده اكيد كلكم ح تقعدو في كرسي محمد ده .. ومن باب كما (تدين تدان) .. او بالدارجي كده (قدم السبت تلقي الاحد ) ارجو انو اسئلتكم تكون هاديه
وماتنسو انكم ح تقعدو هنا .. في نفس الكرسي ..

نبدأ:-

السؤال الاول :

نرجو منك ان تعرفنا عن نفسك تعريف بالتفصيل الممل..

بشير كمبال بشير -الموطن الاصلي الولايه الشماليه محافظة الدبه منطقة أرقي
درست كل المراحل التعليميه الاوليه بمحافظة المناقل .. تخرجت مع الدفعه الثالثه تكنو في العام 2004 .. حاليا طالب دراسات عليا بجامعة الجزيره .. واعمل في الشركه الصينيه للبترول (بتروانرجي) من عام 2006 وحتي الان ..
غير متزوج -اسكن بحري -الدروشاب -محطة17


السؤال الثانى :

اذا لم اكن تكنولوجى كيميائى وددت ان اكون...............

والله يصراحه انا ماكنت بحب الكيمياء نهائي في المراحل الاوليه وكنت( بكجنه) عديل والله .. ماكنت متوقع ادرس تخصص تكون الكيمياء فيهو شئ اساسي .. وكنت بخطط انو ادرس علوم الاشعه التشخيصيه ..كانت رغبه قويه .. لكن طبعا شاءت الاقدار انو ادرس التكنولوجيا الكيميائيه في جامعة النيلين واتشرف بمعرفة الوجوه الطيبه المعانا في المنتدي واللي مامعانا من شباب تكنو وبقية الاقسام في كلية العلوم .

السؤال الثالث :

ماذا تمثل اليك جامعة النيلين؟؟


ده سؤال كبير يامحمد .. النيلين لاي واحد مننا بتمثل كيان انيق وظل وريف جمعنا في يوم من الايام ونهلنا من معينه واتسلحنا منه بسلاح العلم والمعرفه اللي هو زادنا في حياتنا .. النيلين ستظل في دواخل كل واحد مننا هي الام الحنون وهي الحضن الدافئ ،،
ندعو الله ان يعين القائمين علي امرها ويسدد خطاهم ونراها دائما كما نود في طليعة ركب الجامعات السودانيه ..



السؤال الرابع:

بكل صراااااااااااااااااااحة كم مرة حبيت فى الجامعة وخارج الجامعة؟؟؟؟

معليش الخط بقطع .. ماسامع كويس قلت شنو

بصراحه

مره بالداخل ومره بالخارج.. وخت نقطه هنا ماتخربو بيوتنا ..



لسؤال الخامس :

لديك ثلاث زهرات الى من تهديها؟؟

* الاولي لروح اخي وصديقي ورفيقي المرحوم حسان عبدالله.
*الثانيه للدكتور عثمان عطيه.
* الثالثه لك ولكل اعضاء شباب تكنو .

يا هيثم مصطفى! أأأ قصد محمد جيلوجيا!! قلنا ليكم ماتكترو الاسئلة ادونا فرصة معاكم.

يا سيد بش بش! لو خيرت بين امرين: ان تعمل في الجامعة كأستاذ وتؤدي رسالة التعليم ونشر المعرفة (مقابل اجر بسيط).
او ان تعمل في شركة صناعية وتقضي كل وقتك خارج البيت بل تغيب شهور وشهور عن الاهل والاصدقاء والحبان وذلك( مقابل أجر كبير).ايهما تفضل؟

السؤال السادس :- من طرف برعي

يا سيد بش بش! لو خيرت بين امرين: ان تعمل في الجامعة كأستاذ وتؤدي رسالة التعليم ونشر المعرفة (مقابل اجر بسيط).
او ان تعمل في شركة صناعية وتقضي كل وقتك خارج البيت بل تغيب شهور وشهور عن الاهل والاصدقاء والحبان وذلك( مقابل أجر كبير).ايهما تفضل؟
شكرا يابرعي .. اول حاجه وبكل امانه ..انا عندي مشكله كبيره في توصيل المعلومه .. يعني بصراحه والله مابعرف اشرح نهائي .. بلقي صعوبه في انو اوصل المعلومه الفي راسي للناس .. طبعا دي حاجه بتحصل مع ناس كتيرين واحتمال كمان تكون حاصله مع اساتذه حاليين في سلك التعليم .. انا سقت المقدمه دي ماعشان اتهرب من موضوع انو ابقي معلم او معني كلامي ده اني مابنفع اكون معلم واتخارج من الشغله .. ابدا والله لكن بالجد الموضوع فيهو امانه كبيره ومسؤليه اخلاقيه في المفام الاول عملا بقول الرسول (ص) :: اذا عمل احدكم عملا فليتقنه ::
الشق الثاني من السؤال هو الواقع الذي اعيشه حاليا فرضته علي الظروف الان ..انا اعمل في هذه الشركه بنظام شهر عمل وشهر اجازه .. وموقع العمل بعيد جدا من الخرطوم ويفرض علي الغياب التام والبعد التام عن الاهل والاصدقاء طوال تلك الفتره .. لكن بالتاكيد الفائده كبيره جدا ، انا اتحدث عن الفائده العلميه والتطبيقيه التي اجنيها من العمل في مثل هذه المواقع .. كلنا في امس الحوجه للتطبيق وللممارسه الفعليه للعمل خاصه وانو نحنا كلنا في بداية حياتنا العمليه ونحتاج بشده للخبره ولزيادة المعرفه وتدعيم المعرفه النظريه الكسبناها في الجامعه بالتطبيق العملي ,,..
لكل ماسبق انا وبكل شجاعه اقضل الخيار الثاني الذي انا اعمل فيه في الوقت الحالي.. اوبذلك اكون قد اخترت العمل التطبيقي واكتساب الخبره الفعليه بالممارسه الحقيقيه للعمل من اجل تطوير الذات.. واحمد الله انني في غربه داخل الوطن واغيب لمدة شهر واحد فقط بينما اخرون اختطو نفس هذا الطريق ولكن اجبرتهم طروف عملهم علي البقاء بعيدا عن ارض الوطن وغيابهم يحسب بالسنوات .. هذا باختصار خياري ..

سلامات يا شباب....
محمد بتمنى ترد على اسئلتي...
اهلا اهلا ببيشو
1/لو ادوك فرصة ترجع بعمرك وراء:
*اي مرحلة بتحب انك ترجع ليها و لي
*حاجة اتمنيت انك تعملة
*حاجة حتغيرها في حياتك
*شخص ندمت انك عرفتو
2/شخصية:
* اتمنيت تعرفى من زمان
*اثرت في حياتك
*بتعتزر ليها
*بدتيها ميدالية
رد على ديل و الباقي في الطريق

اسئلة الاخت رانيا عوض :

اهلا اهلا ببيشو
1/لو ادوك فرصة ترجع بعمرك وراء:.....
*اي مرحلة بتحب انك ترجع ليها و ليه؟
مابتمني ارجع للوراء ابدا ، بالتاكيد توجد اوقات جميله وفترات رائعه احن ليها لذكراها دائما .. لن انساها بالتاكيد ولكن لن اتمني العوده للوراء .. انا مؤمن بان القادم احلي

*حاجة اتمنيت انك تعملة ؟
زيارة بيت الله الحرام .. ربنا يقدرني اقضي فريضة الحج في القريب العاجل
*حاجة حتغيرها في حياتك؟
المجامله الاكثر من اللازم احيانا .. عيب كبير ملازمني من وقت بعيد .
*شخص ندمت انك عرفتو؟
ابدا والله ماحصل ندمت علي معرفة شخص .. كتير من الناس علاقتي بيهم مااستمرت لوقت طويل لخلاف او اي نقاش بيحصل عادي بين الناس .. بس عمري ماوصلت مرحلة الندم علي معرفة شخص .. اطلاقا .
شخصية:
*اثرت في حياتك؟
تأثرت جدا بشخصية الوالد الاجتماعيه لحد بعيد .. ربنا يديه الصحه والعافيه .
*بتعتزر ليها؟
انا مثل كل الناس ممكن اخطئ في حق شخص .. ولو كنت مخطئ اكيد ما كنت ح انتظر وقت طويل عشان اعتذر .. كنت ح اقدم اعتذاري وقتي .. لانو والحمدلله مابحب اخسر انسان ابدا سواء كان تربطني بيهو علاقه قويه قبل او كانت علاقتي بيهو عاديه .. لكن مع هذا صعب جدا علي انو اسامح انسان كان بيظهر لي كل احترام وتقدير وفجأه اكتشف غير ذلك .. دي الحاله الوحيده المامكن اقبل فيها اعتذار .. حتي وان تبدلت المواقف .
*بدتيها ميدالية؟
الوالده الغاليه حميده ..ربنا يديها الصحه والعافيه .

(1/لو ادوك فرصة ترجع بعمرك وراء:.....
*اي مرحلة بتحب انك ترجع ليها و ليه؟ [/color]
مابتمني ارجع للوراء ابدا ، بالتاكيد توجد اوقات جميله وفترات رائعه احن ليها لذكراها دائما .. لن انساها بالتاكيد ولكن لن اتمني العوده للوراء .. انا مؤمن بان القادم احلي )

بالجد بحيك على الجواب

غايتو انت يابيشو يخلو ليك الفلقصه والاجابات الدبلوماسيه
اصلو ما بتتغير ( وياما انت زرزرتنا ... بس الغريبه ماعندي حاجه ازرزرك بيها !!!)

موقف طريف مرة بيك فى الجامعة يا بشير؟؟؟؟

وماتقول ماف لانى عارف لى اقل شى 3 مواقف

محمد جيولوجيا كتب:موقف طريف مرة بيك فى الجامعة يا بشير؟؟؟؟

وماتقول ماف لانى عارف لى اقل شى 3 مواقف

يامحمد ... هو ح يحكي واحد انت احكي لي الاتنين الباقيين .... Ok ( المقابل كبايه اوفالتيين كبييييييره )

و انا كمان يا محمد برسل ليك كرتونة اوفالتين

و لا اقول ليك كلم رانيا وانا وهي واحد..
ما تخاف برضو برسل الكرتونة...

رانيا محمد عو كتب:و انا كمان يا محمد برسل ليك كرتونة اوفالتين

و لا اقول ليك كلم رانيا وانا وهي واحد..
ما تخاف برضو برسل الكرتونة...

ح احكي المواقف كلها .. خلو الكراتين عندكم بتحتاجو ليها يوم زرزيركم .. وانا من اسي مابشرب اوفالتين ومابريدو .. بحب اسال بس !!!!

لا دبلوماسي ولا حاجة عملتها ظااااااهرة الوردة التالتة لاعضاء شباب تكنو؟؟!!!!انا زاتي ما دايرة منك ورد
تعرف يابشير زي ما قالت رانيا اجابتك حلوة لانك انسان متفائل ما داير ترجع لورا
لاني عكسك تماما ودايما اتمنى الزمن يرجع بي لورا....
حاحاول ابقى زيك وافكر انوالحاضرو المستقبل اكيد احسن من الماضي
اما اسالك شنوووو والله ماعارفة كان نفسي في سؤاااااااال صعب وما لقيت..
سؤالي حصل غشيت في اي امتحاااااااااااان في الثانوي او الجامعة

angel eyes كتب: حصل غشيت في اي امتحاااااااااااان في الثانوي او الجامعة

آآآآآآآخ

يا بشبش فكره المنتدي دا جاتك بتين وكيف وشنو الخلاك تتحمس ليها

أسئلة الاخت Dolly

هل حصل ليك موقف اثر فيك وغير حاجة جواك سواءا بشكل سلبي او ايجابي ؟؟ لو في ياريت توضح
حياة كل شخص لاتخلو من المواقف والاحداث اللي دايما بتخلي في نفس الواحد اثر .. وزي ماقلتي يا Dolly قد يكون الاثر سلبي او ايجابي وتكون نتيجته علي الشخص اما تاثير وقتي يمكن لاي واحد ان ينساه بمرور الزمن ، او يظل هذا التاثير لفتره طويله يترسب في النفوس ويغير الكثير في حياة الانسان .. وفي كل الاحوال في تقديري الاشخاص الضعاف فقط هم من يستسلمون لاي حدث قوي هز حياتهم .. لابد ان نتعلم من الاحداث وناخذ عبر او حكم نستعين بيها في بقية حياتنا .. لكن يجب انو مانستسلم ونحس انو الدنيا خلاص وقفت مع حدث سلبي واجه اي واحد مننا ..
عايز احكي حدث اثر فيني وكان نتيجة حدث اثر في زول تاني .. اشرح اكتر .. يصراحه انا كنت واحد من الناس المعدل التاثير بكل شئ عندهم قوي شديد .. الحصل انو واحد قريبي وبعرفو معرقه كبيره وهو مقيم في واحده من الدول العربيه لوقت طويل .. جمع كل مايملك من حصاد الغربه في مشروع وقدر الله انو المشروع يحترق امامه .. يعني كان شايف بعينه كل امواله وحصاد سنين غربته مولعه فيها النار وهو بصرخ وماقادر يعمل اي حاجه .. قدر الله انو يفقد كل شئ .. ماقدر يتحمل الحصل وفي نفس اليوم فقد عقله .. الان بيتعالج من حاله نفسيه استعصت علي كتير من الاطباء .. للاسف فقد عقله تماما .. رغم انو انا اذكر كيف كان شخصيه محبوبه وعلي درجه من الفهم والاخلاق والذكاء .. بالتاكيد الموقف كان صعب لو اي زول وضع نفسو مكان قريبي ده، لكن لو كان انسان قوي مؤمن بالقدر وراضي بقسمة ربنا كان قدر يتحمل الصدمه مهما كانت قوتها .. بكل امانه الحصل لقريبي ده ماتتخيلو اثر فيني قدر شنو ..
في حياتي حصلت كتير من الاحداث الاتعلمت منها الكتير والحمد لله..لكن بقيت القصه دي لاثرها الكبير علي ..الايمان بقضاء الله وقدره والتوكل علي الله في كل شئ أمر في غاية الاهميه .. ..


*هل حصل خلاف بينك وبين شخص ادى الى ارتفاع الاصوات والضرب لو حصل ممكن تحكيهو وتبين مين الكان غلطان بكل صراحة

حصلت خلافات بيني وبين بعض الناس كتير بصراحه .. بس مااظن بسمح لاي خلاف انو يصل مرحلة مد الايدي .. والضرب .. مهما كان الخلاف كبير ومهما كانت الاساءه جارحه مامكن يحصل كده .. الامور المن النوع ده حصلت اكيد في فترة الطفوله ..لكن مااظن تشغل مساحه في عقل أي انسان عاقل راشد وواعي اتخطي الفتره دي.
وحتي في فترة الطفوله اذكر اني كنت (جراي شديد)..بصراحه مابحب المشاكل ابدا ..


*هل كذبت قبل كدا علشان تجمل صورتك قدام شخص معين ؟؟
اطلاقا لم يحصل .. العياز بالله من النفاق والغش والخداع .. وزي مابقولو يادوللي( الكضب حبلو قصير) .. لابد يجي يوم وينكشف الشخص المنافق علي حقيقته ولا يمكن للانسان ان يظهر خلاف الحقيقه ويخدع الناس بشخصيه مزيفه ويستمر في الخداع لزمن طويل .. لابد انو ينكشف امره وتظهر حقيقتو وان طال الزمن


*ماذا يعني لك الوطن .. والى اي مدى بتضحي عشانو ؟؟

الوطنية هي انتماء فريد وإحساس يرقى بصاحبه إلى شرف التضحية بالمال والدم والروح ممزوجة هذه التضحية بفدائيه وإقدام.‏وسبحان الله حب الوطن والتصاق أبنائه به مشاعر فطرية تتساوى فيها كل المخلوقات يعني زي مابحن الإنسان لوطنه فإن باقي المخلوقات تحن لأماكن إقامتها مهما هاجرت وابتعدت..السودان طننا الكبير الحبيب تعجز الكلمات عن وصفه وتتناثر الكلمات عندما نحتاج اليها لوصفه ووصف حبنا له .. بهواك ياوطن ..

تسلم يا بشير كمبال على الرد الجميل والوااااضح


سؤال :
*هل حصل شفت غلط قدامك وما حاولت تصلحو او تتدخل وتو قفو ؟؟

*ماهي القيمة الاهم والاغلى عندك (الصداقة) ام (الحب) ؟؟؟
ولو خيرت بين الصديق والحبيب حتختار شنوووووو .....


حستنى الاجابة فاااارغ الصبر

Obama كتب:يا بشبش فكره المنتدي دا جاتك بتين وكيف وشنو الخلاك تتحمس ليها

شكرا يا اوباما علي السؤال :
الحقيقه فكرة منتدي او موقع يلم الناس كانت فكره من يعد التخرج مباشره موجوده .. بس ماكنت ملم بالطرق الصحيحه او السهله لانشاء موقع .. يعني ماكان عندي فكره عن مواقع الاستضافه البتوفر ليك الموقع مجانا وتسهل عليك كتير عملية انشاءه ..زي ماشايف نحنا مستضافين حاليا علي موقع (احلي المنتديات) اللذي امدني به الاخ العزيز محمد جيلوجيا وبالمناسبه محمد هو مؤسس منتدي (جيو2000) وهو منتدي خاص بخريجي قسم الجيلوجيا من جامعة النيلين .. بعد علمي بهذا الموقع اجتهدت في تنفيذ فكرة هذا المنتدي لان كل الصعوبات تم تزليلها بواسطة موقع الاستضافه .. حاليا المنتدي لم يصل لشكله النهائي الذي ارغب فيه .. لدي الكثير من الافكار وبعض المقترحات القيمه التي تصلني بطريقه شبه يوميه من بعض الاعضاء المهتمين .. والحقيقه بعض هده المقترحات قيم جدا وسأعمل علي تنفيذه في اقرب وقت ..

angel eyes كتب:لا دبلوماسي ولا حاجة عملتها ظااااااهرة الوردة التالتة لاعضاء شباب تكنو؟؟!!!!انا زاتي ما دايرة منك ورد
تعرف يابشير زي ما قالت رانيا اجابتك حلوة لانك انسان متفائل ما داير ترجع لورا
لاني عكسك تماما ودايما اتمنى الزمن يرجع بي لورا....
حاحاول ابقى زيك وافكر انوالحاضرو المستقبل اكيد احسن من الماضي
اما اسالك شنوووو والله ماعارفة كان نفسي في سؤاااااااال صعب وما لقيت..
سؤالي حصل غشيت في اي امتحاااااااااااان في الثانوي او الجامعة

اول حاجه انا قلت الورده التالته لكل اعضاء شباب تكنو .. اقصد بهذا اعضاء منتدي شباب تكنو .. يعني انتي معانا ياتراجي .. مستعجله للشكل !!
والله ياAngle eyes بالغتي عديل في السؤال ده .. يعني يجاوبوهو كيف ده .. دقيقه افكر
طيب .. انا امكن اكون غشيت مره مرتين كده في الثانوي لكن في الجامعه ماحصل او مابذكر والله .. وحتي في الثانوي الغلط ماكان مني انا !! كان من المراقب لانو (فكه) المراقبه .. يعني الذنب ذنب المراقب .. انا كنت صغير وجاهل

ده شنو يا أوباما .. عندكم حرامي سفنجات في السويد والله شنو ... بالغت فيها الصوره دي ..

بشير كمبال كتب:ده شنو يا أوباما .. عندكم حرامي سفنجات في السويد والله شنو ... بالغت فيها الصوره دي ..

كنت حاعلق نفس التعليق
صباح النور...... بشير تنفع تكون سفير باجاباتك الدبلماسية دي...
1/ بلد نفسك تزورا و لي
2/هل انت انطباعي, وباثر انطباعك الاول في الشخص على تعاملك معه
3/بتحب المطالعة ,واي مؤلفين بتحب
4/الرومانسية بتعني ليك شنو
5/رايك في كل عضو من اعضاء المنتدى بصراحة (البتعرفون)مختصر في كلمة
وشكرا ....