صراع العمالقة في حلتنا -التومة بت موسى والسرة بت ود أب قناية 2

قبل ما اتوجه بيكم لي بيت البكا.. أنا نبهت لإني إقتبست حاجة من قصة تانية والحاجة دي هي بعض الأسماء الفي القصة بس يا بشير ... ونبهت ليها قبل ما أبدا... شوف ليك حاجة غيرا.
طيب نحن لازم نمشي بيت البكا و نحن عندنا فكرة كويسة عن شكلية الصراع بين التومة بت موسى والسرة بت حاج شاكر... ولو تتزكروا في بداية الجزو الأول أنا شبهت ليكم الصراع حقهم بالحرب الباردة زمان بين الولايات المتحدة والإتحاد السوفيتي... لمان الاتحاد السوفيتي عمل ترسانة من الأسلحة النووية .. الولايات المتحدة طوالي زادت من انتاجا النووي وعملت مئات الرؤوس النووية. بي هنا زي ما التومة بت موسى ركبت اللوري بتاع عبد الواحد ود الماحي ومشت ودمدني عشان تزيد الترسانة حقتا من العدة ... صواني وصحانة وطقم كبابي كبار وكبابي شاي وجرادل حديد وغيرو وغيرو ... وملت قفتا من سوق النسوان... بي جاي السرة طوالي قامت زادت الترسانة حقتا من العدة أكتر مما اشترت التومة .. ولمان وصلت الحلة نزلت في طرف الحلة ورسلت أجرت الكارو بتاع حمزة ود شيخ الجيلي شيخ الخلوة بتاعت حلتنا... ختت عدتا الجديدة في الكارو وركبت معاهو .. وخشت الحلة بي عند راكوبة حاجة زينب ست الخدار.. الراكوبة دي حاجة زينب بتبيع فيها الخدر ونسوان الحلة كلهن في الوكت داك بكونوا متلمات عندها ... دخلت بي عند الراكوبة عشان النسوان اشوفوا عدتا الجديدة عشان لو حصل مناسبة في الحلة الناس ما اقولوا عدة التومة أحسن من عدة السرة وإشيلوا حالا. ولمان الاتحاد السوفيتي رسل يوري قاقرين في أول رحلة مأهولة الي الفضاء.. الولايات المتحدة طوالي رسلت أرم سترونغ للقمر.. بي هنا لما العوض ود الباقر راجل السرة جا من تفتيش السليمي بعد ما صرف صرفتو من زراعة القطن بتاع مشروع الجزيرة جاب لي مرتو السرة توبين واحد بتاع زراق والتاني ما متزكر اسمو شنو ... التومة طوالي رسلت جابت ليها أربعة تياب من سوق المدينة عرب .... ولما الا تحاد السوفيتي كان بساعد أعداء الولايات المتحدة في كوبا و فيتنام .... الولايات المتحدة ساعدت المجاهدين الأفغان في حربهم ضد الروس... بي هنا التومة عملت ليها صحبة مع ستنا بت الفاضل عشان ستنا شاكلت السرة قبل كدا في فنجان قهوة كلو واحدة قالت حقها.. وبعد داك اتقاطعوا كل واحدة بقت ما بتجي للتانية.. طوالي السرة بقت تورق الخدرة وتشرب الجبنة مع محاسن بت الجزار عشان عندها عداوة قديييمة مع التومة أصلوا قالوا التومة كانت بتكشح الموية في الشارع والموية بتمشي على بيت محاسن... ومحاسن عملت الشمطة مع التومة .. لمان الرجال اتدخلوا وعبد النبي حلف طلاق علي التومة انها تاني ما تتكلم مع محاسن... محاسن استغلت حلف الطلاق ده وبقت تطاعن التومة بالكلام بي تحت الحيطة...ولما السرة تجي لي محاسن بتعلي صوتا عشان التومة تعرف انها جات لي محاسن البتكرها وما بتدورا... التومة ما بتقدر ترد ليهم طبعاً عشان حالفين عليها طلاق.. بتقوم تقطع فيهم في قعدات تانية ... وتقول قالوا وقالوا وقالوا... ربعوا كلام صاح والباقي نجر من راسا ساي زي نجري الأنا بنجرفيهو هسي دا... والكلام اكتر.. وزي ما الولايات المتحدة شكلت حلف الأطلنطي بغرض محاصرة الإتحاد السوفيتي ...الإتحاد السوفيتي شكل حلف وارسو.. جزو من الدول بقا مؤيد للأطلنطي وجزو بقي مؤيد لوارسو.. نسوان الحلة بعداك بقوا مطالبين بإنهم احددوا موقفهم ... انت مع السرة؟ .. ولا مع التومة؟... واتكون حلف التومة بقيادة التومة بت موسى وستنا بت الفاضل ... وحلف السرة بقيادة السرة بت حاج شاكر ود أب قناية و محاسن بت الجزار طبعاً .. و في نسوان عدم الإنحياز لا مع التومة ولا مع السرة... وبدا كل حلف امارس في عدائياتو ضد الحلف التاني ... وأي واحدة عندها مشكلة مع واحدة من نسوان حلف التومة ... بتلجأ لحلف السرة مباشرة ... وحلف السرة بيحتضنا طبعاً وبحل ليها مشكلتا.. والعكس صحيح... وده شكل الصراع بين السرة والتومة ... لكن هل الصراع حا اقيف في حدودو دي ولا حا اتطور لحاجات تانية؟؟؟ .. حا نعرف لي قدام.

يااااااااااااااابن لادن ابدعت عدييييييييييييل كدا
سيبك من اي زول يقول ليك حاجة ..
رائع بقدر روعتك ,, لك التحية وفي انتظار المزيد والجديد والقادم
ملاحظة :
(ماتمر علينا وتدينا رأيك في المناقشة الجادة بين الجنسين )
تقبلو تحياااااتي

تحياتي ليكم بن لادن و دولي
شكلو يا بن لادن الحرب الباردة دي حتواصل و الاقتصادية و حتتحول
لنووية بعد شوية,ديل محتاجين لحلف الناتو(رغم ان لابقدم ولا باخر)

يا شباب انا عايز أوضح اللبس الحصل ده بالتفصيل بس رجاءاً كملوا الرد ده للنهاية... قبل ما أبدا قصتي صراع العمالقة في حلتنا.. أنا بينت ونبهت وفي السطر التاني من الجزء الأول اني اقتبست حاجة من قصة تانية .. والحاجة دي هي عبارة عن أربعة أسماء لا غير. اتنين عدلت فيهم و اتنين خليتم زي ما هم .. والأسماء دي كالآتي:
1- التومة بت موسى – وأنا أضفت فيها التومة بت موسى ود حاج حمد.
2- السرة بت ود أب قناية – وأضفت فيها السرة بت حاج شاكر ود أب قناية.
3- عبد الرضي- وظل الإسم كما هو.
4- عبد النبي وظل الإسم كما هو.
وده كل الإقتباس اللي أنا اقتبستو من القصة التانية فقط.. والعايز اتأكد ممكن اقارن بين القصتين.
تحياتي للجميع