لو دايــر تــعــرس ..أوعــك مــن ديــل !!!

ان بقيت بخيت.....ربنا يديك....مرا هدية ورضية.... السماحة ما ضروري لانو بعد شوية...... ما حتكون لك سمحة..... حتكون عادية........ نصيحة لك..... النسوان البقولن ديل اوعك تعرس واحدة فيهن.................
'الفنانة..........والحنانة........والحردانة,,,,,المدرسة.......والمدبرسة........والمفلسة
,,,,,, النوامة........والحوامة......واللوامة,,,,,البوبارة. .....والكوُبارة.....والخبّارة
,,,, الممحوقة.....والمطلوقة.....واللايوقة'

طيب....اجي اوريك ليه؟
الفنانة...... حتمرق معاها وتقعد تحوم.....في الحفلات...وتشوف كرسي قدام. وتقعد فيهو..شايل عكازك....وسكينك في ضراعك....وعينك عليها.......ان راجل بشّر ساكت..... تتحنفش...وتقوم......الا يهجروك اتنين...علي الكرسي.....وتجو نص الليل راجعين اهلكم....والنهار كلو نايمين....
الحنانة.........طول النهار برا البيت....تحنن في نسوان الرجال....وهي كرعيها يكونن ما شافن حنة ليهن سنتين...والنهار كلوانت تحاحي في الشفع ما يلمسو الصبغة....
الحردانة...... دي حتكرهك حياتك....اقل كلمة...تتقنّع توبها وتجري بيت ناس ابوها...وتلحقها انت.....وتلقى ابوها....تقعد في طرف العنقريب.... تطقطق...في اصابعيك.. ومدنقر في الواطة...وداير تراضيها ترجع البيت....... لكن احسن حل لك يا تسكنو مع ناس ابوها...ياتجيب ناس ابوها عندكم ....عشان توفر المشاوير والجري..........

المدرسة..........اول حاجة دي ما بتقدر تفرق بينك وبين الطلبة...... وحتقعد..... تعيد وتكرر في الكلام مليون مرة..زي برنامج من الامس الفي تلفزيون السودان....وممكن جدا تسرح وتقول لك فاهم يا شاطر؟

المدبرسة........تلقها طوالي زهجانة.....وشايله اخلاقها في طرف نخرتها...وان كلكلتها ما تضحك.........في النهاية حتوديك التيجاني الماحي...... نزيل اكتئاب

المفلسة.........ما دايرة أي شرح

النوامة......... تجي من الشغل نص النهار وزهجان.... تلقها....تانية المخدة وخاته ايدها تحتها....وتشخر... وريالتها سايله...وحالتها بالبلا.....وتكره اليوم الفكرت انت فيهو فيها........

الحوامة.........طول اليوم فوق كرعيها...في الحلة من بيت لبيت.....وتدخل البيت.. قبال ما انت تجي من الشغل بخمسة دقائق.....وتجري تولع النار.......وتطبخ لك القطر قام....واول ما ينتهي الغدا .....تدخل في سفنجتها....استعداد لرحلة جديدة

اللوامة.....دا نوع مزعج جدا.....لو جبت سيرة اخوك ساكت....تفتح فيهو... الله بيسألني.......سنتنا ديك وقت انت خليتنا بلا قروش وسافرت.... يدخل ويمرق علينا مدلدل ايدهو...كويس موز ساكت ما بيجي شايلو.......ولو جبت سيرة امك...... هي والله امك دي اصلها ما بتريدني.....من توشفني تزعل والنيران تطلق فيها...وتمد قدومها.....ووليداتي ديل السلام.... يا الله ويا امين تسلم عليهم.......

البوبارة.......دي تحملك فوق طاقتك...تشريك الما بينشري....وجيت ناس في البيت...تجري علي علبة الدهب...وتتعنكش علها من راسها لكرعيها....وتقعد تنضم..بايديها وكرعيها ورقبتها...واضنيها...عشان توري الدهب
الكوبارة........ دي تكبر أي موضوع...وتسوي ليهوتوم وشمار..... وتقول لك ناس القبور دقو الطنبور...... لو شافع من شفعك.....عتر ووقع...... تصرخ وتخت ايديها في نص راسها.....وبطول حسها.....ووووووووب علي ووووووووب علي ...مااااااات ...ماااااااااات........ يسمعوها في الشارع....والغريبة لو انت كنت نايم وسمعتها..... تقوم مخلوع.....وتمرق من الاوضة لحدي نص وانته مافاهم حاجه اما لو كان عندك قلب مرضان....اللحظة ديك....من المهد الي اللحد
الخبّارة...... البي تدور الخبار...... لو في نضم تلقاها سكتت الشفع....ونهرتهم عشان تسمع........الجيران مالهم بيهرجو وصوتهم عالي......ولو كانت بتكوي لك في هدوم.....قطع شك......قميص ولاّ جلابيه.....حيكون في عداد ضحايا الحريق.....وممكن الملاح...يحرق وممكن الجردل يكون في الماسورة.... يتملي والبيت يغرق من الفيضان......وحرمكم المصون واقفة فاتحة خشمها وتصنت للجيران........
الممحوقة ..............دي ان جبت دكان كامل وختيتو لها في البيت تكملو في يومين......تصوطو كلو فوق تحت...........لكن ممكن توديها لاصحابك الزعلان منهم لو عندهم مناسبة تطبخ لهم.... عشان....لما المناسبة تنتهي يشحدو وانت تتبسط........

اللايوقة..........دي حكاية تانية.... تمسك في موضوع يحلك منو الجليل الرحيم......يا...دا ....هوي يا دا..... الليله يا يمة.... طرشت؟....وقدرما تطنش هي مصرة.....وممكن تجي جنبك وتخجك.....خجة جامدةعشان تنتبه...... للنقة

هههههههههههههاي

كدي النلم فيها أول! بعد داك الله كريم...

Dolly كتب:حيرتونا معاكم ياشباب دي لا ودي لا ودي لا ودي اوعكم منها ودي ماتقربو منها
نفتشو على عيوب النسوان وانتو كلكم عيووووووووووب
حتى المراة اللي دايرة تشاركم هواياتكم وكورتكم طلعتوها كورانجية واياكم تعرسوها
احسن حاجة ماتعرسو اصلا عشان ماتطلع ليكم في البخت وحدة فيها حاجة من الحاجات دي
وابقو قابلوني....

انتى ماتضايقى يادولى اهم شى الروح الرياضية

(حأعمل نفسي ما قريت تعليقات داليا)..
اللهم زد وبارك يا بش..
بيني وبينك.. نااااااااااااادر ما تلقى واحدة ما (جامعة) لكل المواصفات دي.. لكلها يعني لكلها..
والكويسة.. يكون ناقصها واحدة أو اتنين منهم..يعني الزول يقعد عزابي أحسن .. ولا شنو؟

ليه حتعمل نفسك ماقريت تعليقاتي يامحمد
ماعاجباك ولا ما بنملى العين ؟؟؟؟؟؟؟؟؟؟؟؟؟؟؟؟؟؟؟
عموما رايي قلتو ومتمسة بيهو شدييييييييييد
وخفو شوية علينا
ويامحمد ما اسمعك قلت ياعرس ولا فكرت تعرس
طالما انك فضلت العزوبية على الزواج
طيب

Dolly كتب:ليه حتعمل نفسك ماقريت تعليقاتي يامحمد
ماعاجباك ولا ما بنملى العين ؟؟؟؟؟؟؟؟؟؟؟؟؟؟؟؟؟؟؟
عموما رايي قلتو ومتمسة بيهو شدييييييييييد
وخفو شوية علينا
ويامحمد ما اسمعك قلت ياعرس ولا فكرت تعرس
طالما انك فضلت العزوبية على الزواج
طيب

دقست يااااBOSS

والله أعرس عرس
إنتي كدي خليك من عرسي أنا لما أعرس بعرف أختار وطبعا لازم تكون نقناقة وحشرية وفوضوية و..و..و مش (مرا) في النهاية ؟؟لكن حأعتبرو قضاء وقدر وحاسلم للمشيئة وأحتسب وأبلع بندول الصباح وإنتستين لما أجي من الشغل وفاليوم لما أجي أنوم..
رايك طبعا لازم تتمسكي بيه .. مش رايك؟
وذكرتيني مثل بيضربوه طوالي (لايجوز دوما الأخذ بالرأي الصادر عن خبرة.. فإنك إن سألت ديكا روميا : بماذا يجب أن يحشى الديك الرومي؟ لأجاب : بالديدان والحشرات وحبيبات الرمل!!!)
بحييك يا بش تااااااااااااااااااااني على الموضوع الجااااااااااااامد!!

عليك الله يابشير المواضيع البتعمل ربكة دي تاني ماتجيبا لينا...في ناس كدا قاعين على الهبشة أقل حاجة عايزين يشاكلو (هم عارفين روحم)

ياداليا بتحرقي اعصابك ع الفاضي ليه ؟!! .... بعدين العاااااارف عزو كلام الناس مابهزو

onatee كتب:ياداليا بتحرقي اعصابك ع الفاضي ليه ؟!! .... بعدين العاااااارف عزو كلام الناس مابهزو

ههههاي ههههههاي .. دي اخر نكتة ولا شنو؟

مبالغة يا بيشو....بس بيني و بينك القولتهم ديل كلهم اخير يبعدو منهم....
و طبعا ديل نسبة بسيطة في البنات..دولي روقي دمك انت ما وحدة فيهم زعلانة لي

رانيا محمد عو كتب:
مبالغة يا بيشو....بس بيني و بينك القولتهم ديل كلهم اخير يبعدو منهم....
و طبعا ديل نسبة بسيطة في البنات..دولي روقي دمك انت ما وحدة فيهم زعلانة لي

انا قلت ليها والله يارانيا .... انو العارف عزو كلام الناس مابهزو

معليش يا جماعة نحن طبعا ما قصدنا كل البنات لكن فئات معينة منهم..
يعني ما ممكن الزول يلقى إنسانة بالمواصفات دي أبدا..
أكيد حيلقى خلطة.. حاجة كده زي ماتقول تشكيلة من الشمارات والبهارات وكده..ولازم تكون ناقصة صفتين تلاتة من الصفات دي.. لكن بتحاول تسدهم بقدر الإمكان وتفقع مرارتك.. وتعمل ليك حمى نزفية.. وتخليك تتكلم براك.. ده غير دروس العصر بتاعت المواعظ والحكم واهلي وأهلك.. والعيال.. والمدارس.. والقفة بتاعت الخدار.. و..وتعرج بعد كده على فلانة ديك طلقوها وفلانة ديك شاكلت راجلها.. وحلك لحد ما تقدر تزوغ الصباح (فللي) على الشغل وتجي راجع للدوامة ذاتها من الأول..باختصار..(أيها الرجال.. إحتسبوا)..

ههههههههههههههه موضوع جميل وكلام حلو
انا واحدة من ديل بس على قلب بكري(جوزي) احلااااااااااااااااااااااااااااااااااااا من العسل
انا بقا النوامة بس ما بالصورة الشينة الوصفتها دي حرااااااااااام عليك ويا رجال ماتصدقو الكلام دا
كل مشكلة وليها حل ما دام بتحبها لو بقت كوندليزا رايس حتبقى على قلبك نانسي عجرم
بس ابعدو من الفنانة والحنانة حفاظا على السمعة والصحة بس مافي في الدنيا مرة تخلو من احد العيوب دي

ودايرني اسكت يا بنات شوفو الكلام والهجوم الشانينو الشباب
علينا الحرب بديتوها
ونشووووووووووووووووووووووووووووووووووووووووف مين اللي حيضحك في النهاية

angel eyes كتب:ههههههههههههههه موضوع جميل وكلام حلو
انا واحدة من ديل بس على قلب بكري(جوزي) احلااااااااااااااااااااااااااااااااااااا من العسل
انا بقا النوامة بس ما بالصورة الشينة الوصفتها دي حرااااااااااام عليك ويا رجال ماتصدقو الكلام دا
كل مشكلة وليها حل ما دام بتحبها لو بقت كوندليزا رايس حتبقى على قلبك نانسي عجرم
بس ابعدو من الفنانة والحنانة حفاظا على السمعة والصحة بس مافي في الدنيا مرة تخلو من احد العيوب دي

الموضوع للمناكفه فقط ، في ناس اخدو الحكايه جد .. كلامك جميل والله ياتراجي وفيهو بعض الاعترافات الصريحه .. طبعا ما ح تأثر عليك كتير لانك في كل الاحوال بقيتي ست بيت وخلاص واحد مننا (نحنا الرجال) دقس ، ربنا يكون في عون اخونا بكري .. لكن اعترافاتك دي ح تجيب ليك بعض المشاكل مع حلف الناتو بقيادة دوللي _الامين العام للحزب ..
كلامك الاخير عين العقل ..

شوفو الفيديو دا لغايه ما اجيب المديده الحاره واجي ..

الفيديو دا مع الاعتذار لبرعي لانو جهازو ماآآآآآآآآآآآآآ بقدر يشغل youtube ...بعيد عنكم اظنو بانتيوم 2

Obama كتب:الفيديو دا مع الاعتذار لبرعي لانو جهازو ماآآآآآآآآآآآآآ بقدر يشغل youtube ...بعيد عنكم اظنو بانتيوم 2

هههاي... بالمناسبة انا قاعد اخش النت بالموبايل! انت من زمن الكمبيوترات...عارفكم في السويد متخلفين في الموبايلات دي..
تلقاكم لسة شغالين بالـ 3310

والله مبالغة يا أحمد..
الفيلم معبر بالجد.. لكن أهدوهن الراسن رايح ديل.. أهدوووووووووووووهن..