رثاء فقيد الجولوجيا الريح مهدى.... وكان انسان

الحورى الأربعاء أغسطس 05 2009, 13:47

[

وكان انسان.........
شعر/ صلاح الشيخ

رحل من دون يكلم زول
ولا وصلت خطاويهو
وما عرفت مراكبو القيف
عشان ما تضم شواطيهو
رحل حادينا فى الضلمة
ولا تمت مساعيهو
رحل بى صمتو واحلامو
وفات بى روعتو الفيهو
كان اجمل اذا اتكلم
وكان ارحب اذا تجيهو
فات بى سرو كان كاتمو
بدون ما لينا يفشيهو
كان اوسع كما الاطياف
وكان انضر فى واديهو
يشيل عنك حمل غاتم
دون ما انت تديهو
وما اجمل ملاقاتو
اذا حنت منافيهو
كان ابعد بعد فرحو
وعشقو الفيهو طاويهو
كان غناينا فى القمرة
وما احلى غناويهو
كان الطير رفيق حزنو
وساكن فوق تقاويهو
كان انسان .. كمان فنان
وكل الكون يناجيهو
عشان يسمع حجا الاوطان
وما اروع حكاويهو
ويا انسان رحلت براك
وبعدك كيف نقاسيهو
وكت وحدك رفيق ليكا
تشيل مرك تواسيهو
لا الموت عليك اسرع
كانك انت داعيهو
ويا الريح اذا ما غبت عن الكون
طيفك فينا نبنيهو
اذا فى يوم نساك الكون
لى السواهو نشكيهو
اذا كان التراب غطاك
مزارعنا بتجافيهو
اذا كان البحر خطاف
نخااصم كل مرافيهو
بس كان القدر غدار
وكان غالبنا تمويهو
وكانت نخوتك سايقاك
عشان غيرك بتفديهو
اذا كان الرحيل لا بد
شتيل ذكراك نخاويهو

للفقيد الرحمه والمغفره .. نسأل الله ان يتقبله القبول الحسن ويجعل الجنة مثواه ..
كلمات معبره والله ياحوري , جزاك الله خير .. لمن لايعرفون الفقيد مهدي , ارجو منك اخي الحوري ان تقدم عنه نبذه صغيره , وصوره ان امكن ذلك ..
جزاك الله كل خير ..

رثاء فقيد الجولوجيا الريح مهدى.... وكان انسان

رثاء فقيد الجولوجيا الريح مهدى.... وكان انسان

رد: رثاء فقيد الجولوجيا الريح مهدى.... وكان انسان