صراع العمالقة في حلتنا - التومة بت موسى والسرة بت ود اب قناية

صراع العمالقة في حلتنا - التومة بت موسى والسرة بت ود اب قناية
قبل ما ابدا في قصتي دي عايز أنبه لحاجات. الأولي انو الكلام الحا اقولوا ده نجر من الخيال. ثانياً في نص القصة دي في حاجة انا اقتبستها من قصة تانية عشان برعي ما اجيني ناطي بعد شوية اقول لي انت شفيت. ثالثا كلمة حلتنا دي نحن بتعني لينا (نحن قصدي بيها نحن ناس ودمدني وما جاورها) بتعني قريتنا، مش بمعني حينا أو فريقنا زي ما بقولوا ناس الخرطوم. الحلة دي عندنا بمعنى القرية... وحلتنا دي بالضبط كده غرب ودمدني حوالي 18 كيلو..وخليكم من اسمها شنو.
خلوني قبل ما أحكي ليكم شئ من قصة الصراع بين التومة بت موسي ود حاج حمد وبين السرة بت حاج شاكر ود اب قناية، أوريكم أصل الصراع ده خلفيتو شنو وسببو شنو كما وردت لينا الرويات. وصدقوني الصراع حقهم ده بزكرني الصراع بين الكتلة الإشتراكية السوفيتية بزعامة الرئيس السوفيتي خيرتشوف وبين الكتلة الرأسمالية الإنبريالية بزعامة الرئيس الأمريكي أيزينهاور أيام الحرب الباردة...
أصل الصراع بيرجع لي أكتر من كم وخمسين سنة لي ورا، يعني زمن السرة والتومة كانوا في سن المراهقة كدا وقبل ما إشلخوهم وادقوا ليهم الشلوفة والبسوهم الزمام والحجل. في الزمن داك التومة والسرة كانوا صاحبات ونديدات وما بتفارقن. وهن لي ورا كدا بنات عم. أها في ناس في الحلة كانوا بقولوا السرة اجمل بت في الحلة، وناس بقولوا التومة هي اجمل بنات الحلة. والكلام طقش اضان التومة وبرضو وصل للسرة، لكن ما كان مهم شدييييد يعني في الوكت داك. بقى مهم متين؟؟... اوريكم. حاج محمد ود هجو شيخ الحلة كان متزوج مرتين، واحدة في الحلة و واحدة في الصعيد على جهة الدمازين كدا. مرتو الفي الحلة الله أداهو منا بنات بس عشان كده عرس ليهو واحدة تانية في الصعيد. ومرتو الفي الصعيد الله أداهو منا ولدين عبد الرضي وعبد النبي. أها بعد حاج محمد ما كبر وبقي مابقدر امشي الصعيد ومرتو الفي الصعيد ماتت.... قال لي أولادو اخلوا الصعيد واجوا اقعدوا معاهو في الجزيرة. عبد الرضي لمان جا الحلة كان متزوج لكن عبد النبي كان لسا ما اتزوج عشان كدا بقي محل انظار بنات الحلة كلهن.. كان لمان إجي ماش في الشارع... البت بتقلب الفندق الكبير علي وشو جنب الحيطة عشان تطلع فيهو وتعاين لي عبد النبي بي فوق الحيطة.. وعبد النبي الزمن داك كان شايف شبابو وعاجباهو الفكرة... المهم... عبد النبي لما كبر شوية وعقل وفكر في العرس ... دار السرة.. أصلوا كان بحبها وشافا في بيوت عرس كتار... وتحت تحت كده الناس قالوا واحدة من اخوات عبد النبي مرة لاقت السرة.. جات بيتهم لي غرض كدا.. وكلمتا انهم عايزين اخلوا ابوهم اخطبا من ابوها لي اخوهم عبد النبي... وقالت ليها كمان: عبد النبي أخوي زااااتو بريدك شديد وعايزك. و السرة طارت من الفرحة... وشعرت بإنها حققت إنتصار كبير على كل حسناوات الحلة... بما فيهم التومة بت موسى.. وجرت سريع كلمت أمها وأخواتا براحة كدا.. وبقت قاعدة منتظرة اليوم الموعود البجي فيهو حاج محمد ود هجو شيخ الحلة وأبو عبد النبي لي أبوها حاج شاكر ود أب قناية عشان اخطبا منو.. وبقت تعد في الأيام وتعد وتعد...
بي هناك حاج محمد ود هجو شيخ الحلة لمان فتحوا ليهو الموضوع، حلف ستين يمين طالما التومة بت موسى، اللي هي بت صاحبوا وأخوه الروح بالروح قاعدة.. ولدوا عبد النبي ما بعرس واحدة تانية.. وطبعاً كلمة حاج محمد حاتمشي على رقبة الجميع... وفعلاً... عبد النبي عرسوا ليهو التومة بت موسى ولا على كيفوا.
واتخيلوا معاي منظر السرة وحالتا... بقت الوجيعة وجيعتين... عبد النبي البتريدوا ختفوهو منها... والختفوا منو؟؟ الغريمة ... والبقت الآن العدو اللدود... التومة بت موسى.
والكلام كتر بعد داك.. قالوا التومة وأمها عملوا لي عبد النبي وأبوه ود هجو عمل عند الفكي شعيبو في كنبو الفلاتة القدام... وقالوا وقالوا كلام كتييييير.
السرة بعد داك ما قعدت كتير وعرست هي زاتا.. أصلوا الدايرنها كانو كتار. المهم.... الكلام ده هسا ليهو أكتر من خمسين سنة.. والسرة والتومة بقوا حبوبات وأحفادهم فكروا في العرس... والعداوة والصراع بقت أزلية مع الزمن.
هسا عبد الرضي ود هجو أخو عبد النبي مات والنسوان مشوا بيت البكا.. وإتلاقت السرة وبناتا والتومة وبناتا في بيت البكا... عايزين تعرفوا الحصل شنو؟؟؟ أنا راسي وجعني من كترة النجر.. لو عجبتكم القصة قولوا لي عشان أواصل... ولوما عجبتكم برضو قولوا لي عشان أقيف وأقرط لحدي هنا.
تحياتي.

والله يابن لادن انا اقترح انك تواصل النجر بتاعك ده (الي حين اشعار اخر ) .. غايتو حيكون نجر بتاع زول مبدع عديل .. لو كان ده نجرك انت ماشافيهو من زول .. عموما انا شامي ريحة الصحفي الساخر الكبير الفاتحيوسف جبره في الموضوع ده .. ح اتأكد في الاول .. اذا طلع الكلام ده منقول يبقي ح تاخد كرت احمر لمده شهر من المنتدي (انا جادي) لانو الزول البينقل حاجه الامانه بتقتضي انو يكتب كلمة ( منقول ) زي ما فلانه بتكتب (علي طريقة برعي )..
فايتو لو منقول الله قال بي قولك ولو حقك تبقي ابدعت عديل ..
وان غدا لناظره قريب!!

ياخ مالك قطعت القصة فجأة
كملها طبعا بالجد لذيذة واسلوبك حلو يا بن لادن
عندك موهبة جميلة ماشاء الله عليك
انا مستنية..
تقبلو تحياتي

واصل ياخي ,اول مره عضو يبدع من رأسو
طوالي شغالين منقول منقول

انت عارف يابشير في قصة كدا قريتا قبل كم يوم في حكايات..بس اتأكد منها واجيب ليك الدليل..اصلو بن لادن دا مكرت مكرت مافي مفر....
لكن بالجد يابن لادن طلعت حبوبة..ياخي انا بدون مااشعر لقيت روحي نايم
لك التحية والتقدير

أولاً الشكر كل الشكر للعزيز أوباما والأخت دولي وربنا اديكم العافية واجعلنا عند حسن ظنكم.. أما انت يا بشير... خليك معاي... أولاً.. الأمانة العلمية تقتضي منك أولاً تتأكد انو هل القصة منقولة ولا لأ قبل ما تطلق تهديدك... وانت اطلقت تهديدك قبل ما تتأكد.... و ده فيهو تشويه لصورتي قدام الأخوة الأعضاء في تهديد لي باتهام خاطئ بشئ ما حصل انت ما عندك عليهو أي دليل.. ثانياً وعملاً بمقتضى الأمانة العلمية أنا نبهت في البداية لحاجة وحيدة أنا اقتبستها من قصة تانية… بالتالي يا مدير الموقع أنا بديك كرت أصفر بصفتي عضو في هذا المنتدى وبطالب كل الإخوة الأعضاء بإدانة التصريح ده من مدير الموقع... أما انت يابرعي لو ما جبت جريدة حكايات القلتها دي شيل شيلتك معاي... عليه يا عزيزي أوباما ويا أختنا دولي أنا ما حا أكمل (نجر) القصة دي علي الأقل في الوقت الحالي لأنو لحدي الآن أنا حكيت سبب الصراع بس ولسا ما نجرت الباقي وحصل الحصل من مدير الموقع لو واصلت حايحصل ايه.
تحياتي

لا ...لا
انا بقول ليك واصل لانو قصتك حلوه .. واقول ليك حاجه يا احمد انا فتحت المنتدي الصبااااح اول من جيت المكتب وشفتها ( القصه ) وقلت اقراها بمزااااااج لما اكون فاضيه ... وحسي عجبتني

انا بدين واشجب واستنكر وبعلن كامل تضامني مع بن لادن
(اوعي الامريكان يكونو راصدين منتدانا دا)

سلامات :
اول حاجه يابن لادن بابن عليك ما قريت كلامي او ردي عليك كاملا.. او مافهمتو كويس ,, انا قلت بالنص اني ح اتأكد في الاول وبعد داك يحصل قرار .. يعني مااستعجلت وحكمت عليك بانو ماعندك امانه ولا شوهت ليك صوره ، العكس انا قلت انك ح تكون مبدع لو الكلام ده بتاعك .. ما اظن كده اسأت ليك ,,
تاني حاجه موضوع الكروت ده عباره عن دعابه مني ، لانو مافي حاجه اسمها كروت حمراء او صفراء ولا انا عندي الحق انو اطرد او اوقف اي عضو من الاعضاء بمزاجي .. انا لو عندي كنترول ح يكون علي نوع المشاركه وضمان انو مافيها اساءه لشخض او كيان ,, غير ذلك ماعندي حق امنع اي عضو من اي مشاركه من اي نوع في اي وقت ..لانو كوني مدير للموقع ما معناها بملك الموقع وبديرو بمزاجي ..
ايضا اعتقد انو الاخ برعي ماقصد يسئ ليك لمن قال انو قرأ الموضوع قبل كده .. انا متأكد كان قصدو المزاح و(التدوير) ان جاز التعبير ..
عموما ارجو انك تتم باقي القصه خاصه انها انتهت لمن التومه وبناتها والسره وبناتها اتلاقو في بيت العزاء .. واذا ماتميتها ارجو من الجميع الدخول للرابط ادناه لمتابعة ماحدث في ( بيت العزاء بين التومه وبناتها والسره وبناتها ..)!!!!
http://www.alwatansudan.com/index.php?type=3&id=11184
ومبدع يابن لادن ( وعفيناك من الكروت بالوانها المختلفه ....

أنا بحي الأخ بشير على الدبلوماسية بتاعتو القاطعا من راسو دي. وصدقوني دبلوماسية بشير دي خربت علي أهم حاجة. أنا عارف بشير قال شنو وقصدوا شنو وعارف كمان انو برعي بمزح وعايز ادور بس. لكن أنا عملت الحركة دي عشان أخلق لي موضوع تاني.. والناس تنشغل من باقي القصة المفروض أكملا وما تقول لي باقيها وينو (أزوغ زوغة خفيفة كدا يعني) لأنو النجر ده صعب يا شباب. ومسافة الناس تنسى موضوع بشير وبرعي أنا أكون قدرت ألقى لي نجرة نجرتين كدا وأنزلهم في المنتدى.عشان كان راسي ضرب وما لقيت لي نجرة و ما تميت القصة موقفي اكون كيف قدام ناس فلانة؟ ( ولا ما كدا يا برعي) لكن بشير عمل لي فيها دبلوماسي ونهي الموضوع كدا معناها أنا لازم أتم القصة. وقريباً ان شاء الله. (الله اجازيك يا بشير)
تحياتي

انننن .... انننننن

ياخوانا الزول ده عايز يتم شنو ؟ القصه وتميناها ليهو قبيل !! قبل كده Onatee اضطرت تفهمك موضوع كده برساله خاصه .. شكلها ح تكررها معاك يا .. مبدع !!
قلت لي (النجر) صعب !! خش اللينك الرسلتو قبيل وما حتلقي اي صعوبه في النجر .. لانو نجرك مؤسس ..

سلام يا شباب
بن لادن قصتك رائعة جدا حتى لو مقتبسة فسردك للرواية جميل
بتمنى انك تواصل فيها .نحن كم عضو طالبنا بالمواصلة و مندتانا ديمقراطي

ااااها او ممكن تواصلو في صراع العمالقة بيشو و بن لادن ومحاولات
برعي لتسخين النار
خارج النص:
بن لادن زوغة مافيي

يابشير في ناس مابقرو جرايد يعني بن لادن كتر خيرو ( حسي دي نقطه لصالح بن لادن )
و يارانيا عجبتني الفكره الشريره انا برضو ح انضم لفريق التسخين

onatee كتب:يابشير في ناس مابقرو جرايد يعني بن لادن كتر خيرو ( حسي دي نقطه لصالح بن لادن )
و يارانيا عجبتني الفكره الشريره انا برضو ح انضم لفريق التسخين

يا شباب انا عايز أوضح اللبس الحصل ده بالتفصيل بس رجاءاً كملوا الرد ده للنهاية... قبل ما أبدا قصتي صراع العمالقة في حلتنا.. أنا بينت ونبهت وفي السطر التاني من الجزء الأول اني اقتبست حاجة من قصة تانية .. والحاجة دي هي عبارة عن أربعة أسماء لا غير. اتنين عدلت فيهم و اتنين خليتم زي ما هم .. والأسماء دي كالآتي:
1- التومة بت موسى – وأنا أضفت فيها التومة بت موسى ود حاج حمد.
2- السرة بت ود أب قناية – وأضفت فيها السرة بت حاج شاكر ود أب قناية.
3- عبد الرضي- وظل الإسم كما هو.
4- عبد النبي وظل الإسم كما هو.
وده كل الإقتباس اللي أنا اقتبستو من القصة التانية فقط.. والعايز اتأكد ممكن اقارن بين القصتين.
تحياتي للجميع

خلاص يا برعي .. موضوعنا طرشق ..
الحكايه جابت ليها فرق تسخين ..
ناس اوباما ورانياعوض دايرين يخلونا نتشاكل مع (بن ناجر) أقصد بن لادن وهم يتفرجو ..
انا المستغرب ليهو رانيا دي !! يعني اوباما مسمنو علي اوباما الامريكي..يبقي قطع شك بتاع مشاكل ..طيب لكن اسم رانيا ده اسي اسم مشاكل !!!!!! مااااااأظن ..!
خلاص يابرعي دي نمشيها ونشرك لصاحبنا ده مره تانيه ..والمسخناتيه ديل خليهم ، ليهم يوم ..

بن لادن كتب:يا شباب انا عايز أوضح اللبس الحصل ده بالتفصيل بس رجاءاً كملوا الرد ده للنهاية... قبل ما أبدا قصتي صراع العمالقة في حلتنا.. أنا بينت ونبهت وفي السطر التاني من الجزء الأول اني اقتبست حاجة من قصة تانية .. والحاجة دي هي عبارة عن أربعة أسماء لا غير. اتنين عدلت فيهم و اتنين خليتم زي ما هم .. والأسماء دي كالآتي:
1- التومة بت موسى – وأنا أضفت فيها التومة بت موسى ود حاج حمد.
2- السرة بت ود أب قناية – وأضفت فيها السرة بت حاج شاكر ود أب قناية.
3- عبد الرضي- وظل الإسم كما هو.
4- عبد النبي وظل الإسم كما هو.
وده كل الإقتباس اللي أنا اقتبستو من القصة التانية فقط.. والعايز اتأكد ممكن اقارن بين القصتين.
تحياتي للجميع

ولا يهمك يابن لادن ماتشتغل كتير بي بشير كمبال ده .. يازول واصل في نجرك عادي واقتبس من حيث تشاء .. بس خلي بالك واسع لانو لسه راجيك كتير مع الزول ده ..

يا جماعة هس الجاب سيرة المشاكل شنو..كدي بس قولو خير
معقولة يا بيشو انا بتاعت مشاكل....
انا لخصت الوضع الحاصل بس.........

رنو انت جنيتي ...؟ ماتهدي الناس نسيتي انو احنا تبع فريق التسخين