دخان نسوان السودان

abogola الثلاثاء مايو 26 2009, 16:10

دخان نسوان السودان ....ضد كيوتو

كانت الساعة الرابعة مساء حين نادت سعيدة جارتها تهانى وايضا الجارة الاخرى العروس نادية....
وكان الرائى يبصر من بعيد تصاعد الدخان من بيت سعيدة ورائحة الدخان مميزة كالعادة وهى مثار تعليقات اهل القرية حين تصل الى انوفهم وخاصة غير المتزوجين منهم ويصيح بعضهم ((يا الله تعرس لينا))....

كانت سعيدة مشهورة بكثرة الدخان فى بيتها ولا يمر يومان الا ويتصاعد من بيتها ذلك الدخان وعندما يسألنها نساء القرية كانت تتحجج كل مرة بحجة جديدة....اخر تلك الحجج انها تقوم بعملية الدخان لأجل طفلها المريض ...حضرت سعاد على عجل وحضرت نادية وفى يدها كيس اسود به كمية من الطلح الاضافى والذى تخفيه عن اعين الفضوليين داخل ثوبها مع ان الامر ليس عيبا ولكن لحداثة تجربتها اراها تمارس الخجل ايضا....

سالت سعيدة نادية عن ما تخفيه فأرتها الطلح ...هنا ضحكت سعيدة وقالت لها.:-
:- ما دا الموضوع الناديتكم عشانه زاته..
نادية مستغربة:-
:- موضوع شنو يا سعيدة..
:- موضوع الدخان البنعمل فيهو كل يومين دا...
:- هى ما تعملى هسع فى زول سألك..
:- انتى ما فاهمانى يا نادية ...

فى ذلك الوقت كانت تهانى تجلس فى تلك الحفرة المحترقة ولم تعر الونسه اهتماما لأنها ستعرف ما يقال حين تنتهى من طقوسها ...
:- اها الحكاية شنو يا سعيدة والله وقفتى قلبى ..
:- الحكاية وما فيها قالوا انو الدخان البنعمل فيهو يضر بالارض...

:- تطلقها تهانى ضحكة مجلجلة:- مالها يا بت امى الارض بتتحرق هدا نحن بنحرق فى جلدنا وما قلنا شئ خلى الارض....ومن قمت ما سمعت لى بارض بتحرق...اتى اظنك دايرة تخلى الدخان يا سعيدة ودايرة ليك سبب....ونحن ما بنخليهو كان تصبح رماد...انتى دايرة يطلقونا ولا شنو....يا مره هييي والله ابو اولادى ما يرضى كله كله...
:- هى انا ما الفته من راسى دا كلام قالته لى عواطف بت الزين بعد جيتها من الخرطوم امس...
:- اها وقت قالوهو ليك مالك ما وقفتيهو وقت مقتنعة....

:- والله قلت اعمله اخر مره ما معروف يمكن الحكومة تطلع قرار وتقول تانى ما نتدخن...
:- هههههه تطلقها نادية ضحكة...يجازى محنك ااسعيدة نحن لسع فى شهرنا الاول دايرين توقفوهو والله ولا بنوقفه ولا حاجة...وبعدين عواطف دى مما مشت الخرتوم وسكنت فيها بقت كلها محن ومصائب...ودا السبب الطلقوهو بيها زاته.
:- كدى اسكتن اسكتن هديك عواطف جاية علينا...كدى قومى يا تهانى النطفى الدخان دا...
:- والله كان اتحرق ما اقوم خليها بعد تجى النشوف قصتها شنو ....

تدخل عواطف ..وبعد السلام والسؤال عن الاهل جميعهم نراها تغطى انفها خوفا من استنشاق الدخان اليها...
تبادرها سعيدة :- هى يا عواطف وري النسوان ديل القصة الكلمتينى بيها امس ابن يقتنعن لى كله كله..
نادية:- هى عاد ما دايرين نفهم القصة فى الاول وبعد كدا نقتنع...
عواطف...امرأة تبدو على ملامحها الثقافة...فهى تسلم بطرف يدها....وتضع الثوب بدون طرحة على رأسها...وكثيرا ما ينحسر فيكشف شعرها المرتب بعناية فائقة...تخرجت من الجامعة وحصلت على وظيفة بأحدى الجمعيات التطوعية بالخرطوم...مثقفة اكثر من احتياجاتها للثقافة...يبدو ان لا احد يستطيع مجاراتها عند التحدث ...فهى تملك الكثير من المعلومات المهمة حول العالم بأسره...

تقول عواطف :- العالم بقى يساهم بكمية كبيرة فى ثقب الاوزون وذلك نتيجة لإستخدام الطاقة بكمية مهولة دون التحسب للمستقبل مما يودى الى انبعاث غاز ثانى اوكسيد الكربون الى الجو...استخدام الكهرباء غير النظيفة ...وحرائق الغابات....كلها تؤدى الى ثقب الاوزون...ونحن فى السودان الطاقة بتاعتنا نظيفة...لاننا بنستخدم كهرباء المياه....ومشاركتنا فى احتراق الاوزون يشكل نسبة ضئيلة جدا....لكن نحن النسوان بنزيد النسبة دى بالدخان البنعمل فيهو كل يوم ...هسع لو جمعتى مليون مره وقعدن يتدخنن فى مكان واحد وعاينى للدخان البيكون طالع شكله كيف...وما تنسن اننا دولة موقعة على اتفاقية كيوتو للحد من انبعاث ثانى اوكسيد الكربون للجو....عشان كدا لازم نشارك فى ساعة الارض...وما نحن بس البنشارك فى يوم الارض كمان فى دول كتيرة جدا...واستراليا مثلا قررت ايقاف استخدام الكهرباء فى اماكن مهمة جدا لمدة ساعة عشان يلفتوا الانتباه ...

اها رايكم شنو نحن نوقف الدخان دا نهائى عشان نثبت للعالم اننا بنساهم فى الحفاظ على البيئة....
يبدو ان تهانى ونادية وسعيدة قد سرحن بعيدا ولم يفهمن ما قالته عواطف....
تهانى :- والله ما فهمنا اى شئ كدى قولى لينا كلمة كلمة وخلينا النشوف اخرتك شنو...
عواطف :- يا نسوان اقول ليكن براحه كدى...نحن بنحرق فى الطلح صح...
:- اى صح..
:- اها نحن بحريقنا دا بنسخن الجو ...وفى ناس ساكنين فى القطب الشمالى والقطب الجنوبى اسمهم الاسكيمو ....وبى طريقتنا دى الجو حيسخن....والجليد حيذوب...والناس دى بتغرق....وما بعيده نحن كمان نغرق...
اها فهمتنى ولا لسع....
:- والله فهمنا لكن بقت على عيدان الطلح ديل يعنى ...
:- لا ما كدا لكن نعتبرها مساهمة منكن فى الحملة دى...
:- هووووووووى يا عواطف....بطلى الشغل البتعملى فيهو دا....والله نحن بنحافظ على بيوتنا وعلى اولادنا...والناس التغرق....ان شاء الله يعدموا طافى النار....

هنا اكفهر وجه عواطف ورفعت توبها المنحسر وانسلت خارجة عنهن...وتواصلت الونسه...
سعيدة :- اها رايكن شنو فى كلام المخرفه دى..
تهانى :- هوووووووى دى مره فاكة منها الشغلة وما عندها بيت تحافظ عليهو....ونحن لا بنسمع كلامها لا حاجة...نخلى الرجال النشوف رايهم شنو كان قالوا وقفوهو بنوقفه لكن برانا تب ما بنقول حاجة ....
ذهبت تهانى الى بيتها..
ونادية ايضا...
يأتى زوج سعيدة الى البيت منهكا وبى اخر نفس يرمى السلام....
يبادرها زوجها :- شايف عواطف كانت هنا مالها طلعت سريع ...
:- البركة الطلعت والله كان عرفتها قالت لينا شنو تموت بالضحك...
:- اها قالت شنو المرة دى..
:- قالت لينا الناس عايزة توقف الكهرباء واى حاجة لمدة ساعة فى العالم كله عشان ناس الاسكيمو ما يغرقوا...
:- ونحن مالنا ومال الكهرباء لمبتنا الواحدة دى نوقفها يعنى...هى وين الكهرباء...خلى بعد يجيبوا لينا الكهربة ينقطعها عشرة ساعات خلى ساعة واحدة...
:- دا ما المهم ..
:- اها المهم شنو...
:- قالت لينا نوقف الدخان وتانى ما نتدخن...
:- اااااااااااااااااا
:- اى والله
:- المرة دى مجنونة ولا شنو ...
:- اها انتى رايك شنو ....
:- قلت اجرب اخلى الدخان ...
:- دايرة تخليهو يا سعيدة...
:- يمكن..
:- اقول ليك حاجة ..
:- اها..
:- على الطلاق تغيبى منه يوم واحد انتى طلقانة وبالتلاتة كمان...النشوفك بتسمعى كلامى ولا كلام عواطف...
قامت سعيدة بسرعة تجرى فى اتجاه المخزن...واتت بمحفار الى داخل بيتها...
:- مالك اامره...يسألها زوجها...
:- دايرة احفر لى حفرة دخان ..
:- ما هدى عندك محفورة ...
:- تلتفت سعيدة الى الحفرة فتجدها بجوارها...هنا ينقطع نفسها....وتتصبب عرقا...
:- اااى عارفاها بس قلت اسو لى تانى واحدة كل حاجة ولا زعلك ات...
تنطلق ضحكة مجلجلة من الزوج...تتبعها دموع من سعيدة....لتعلن وفاء لا حدود له...
يقترب زوجها بحنية ...يربت على رأسها...ترفع رأسها وتقول :-
بتطلقنى االخزين....؟؟؟
:- ها مره قولى بسم الله طلاق شنو بهزر معاك ساى...

ومن يومها اصبحت سعيدة العدو الاول لإتفاقية كيوتو....ولساعة الارض....
بصورة يومية....
وكله من عواطف....

abogola الخميس مايو 28 2009, 11:08

الناس ديل خبارهم الخجل كتلم ولا شنو ولا الموضوع مابقدرو يردو عليهو خايفين من الرد

يا النبي منكم

SHAHINAZ الأحد مايو 31 2009, 12:10

كيف يا abogola انشاءالله كويس
بس دايرة اسال سؤال واحد دحين دي ماحاجة سعدية بتاعة الكمونية ولا دي تشابه اسماء
مشكور علي توضيح اتفاقية كيوتو من منظور سوداني

abogola الأحد مايو 31 2009, 21:01

تسلمي علي المرور وانشاءالله تكوني مستفيدة بس اما عن سعاد وكدا ايوة بس دي بت بتها ههههههههههههه

abogola كتب:الناس ديل خبارهم الخجل كتلم ولا شنو ولا الموضوع مابقدرو يردو عليهو خايفين من الرد

يا النبي منكم

ههههههههه والله يا ابوجله حيرتنا زاتو ..عايز الناس يردو يقولو شنو اسي في موضوعك السياسي البحت ده !
غايتو ناس الاسكيمو يطيرو .. بلا يخمهم !
وتسقط كيوتو DRIVE