قصيدة رووعة للشاعرة شيراز العبيد

اذهب الى الأسفل

قصيدة رووعة للشاعرة شيراز العبيد

مُساهمة  shoosh في الخميس أغسطس 05 2010, 11:18

علّق..للشاعرة شيراز العبيد

قصدك عقلك في هواي انا عصلج وعلّق
تقصد أنو قليبك بي زي طفلا يافع بي والديهو دوام اتعلق
قاصد انو روحك زي عصفورا طار بجناح الشوق في سمايا وحلق
خلاصة القول انو هواك لولاي لا انجبو رحم الغيب لا اتكون لا اتخلق
وانو الشوق جواك لولاي لافاض انهار لا كسر المد لا أتدفق
وأني الحلم الساكن في أيامك وغاية املك يصدق يوم ويتحقق
وأنو قليبك بي هيمان لاغرّب يوم عن دربي ولا يوم شرّق
وأنك زول في قليبو أحتار لا جابلو الطوب لا ساعدو فلّق
لا نصبلو بشوقو شرك لا مهدلو دريب شان يهوى ويعشق
لا سوالو سهام الريد شان يرمي قليبا اصلا بي نار شوقو اتقلّى وغلى واتحرّق
وأنك زول محتار ووديع وواقف بين نار قلبو وجنة عقلو في مفرق
وكملت هسي معاك بالعقل العصلج وعلّق
يازول ماتتلف ساي اعصابك وتغضب وتحزن وتقلق
عقلك عندك لسع ملكك وماحايحيد ابدا عن دربك
لا في يوم فارقتو ثواني ولا قلبك يوم حايفارق صدرك
ما أنت في يوم لو علّق عقلك مابتتحمل ازعل لحظة
ولا بتتوعدني بهجرك وصدك
وماحاتعيد وتزيد في لومك ..وقبل الدمعه ماتجري في خدي حاتجرح خدك
وفايق !!!
فايق وخالف رجلك فوق التانيه
وعايز تقنع انو زمام الأمر فلت من يدك
وأني مطرزة ليك خيال ذكرايا حجاب
مابين زاكرتك وقلبك وعقلك
وأنك انت مدفق لي الشوق اسباب يسوق خطواتنا دوام علي دربك
وانك زارع لي الريد تيراب بين شمسك وحبك ومطرك
وأنك انت معاي بالجد مظلوم
وبراءة الذئب من دم يوسف دايما هذا قرار محكمتك
وأنو جزاك معايا علي المعروف جزاء سنمار
تبني لي بالريده قصور وانا بالنكران افنيك واهدك
لملم ورقك ..مامحتاجه محامي دفاع
وقول بالمنطق والأقناع
كيف الأمر فلت من يدك وأنت مقسم لي دنياك كيمان
كوم خاصتنا …. والكوم التاني براك بيخصك
ياسيدي سماح انا لا محكمتك لا قاضيك
لاك أنت وليد يعقوب … لاني أخوانك شان أأذيك
لافكرت ولادبرت ولاخططت ولا قررت في بير الخوف ارميك
لا أنت بنيتا قصور سنمار لاني الملك الطاغية الجاني عليك
وأنا لاهديتك خوف والم عشان بالفرحة اجي وابنيك
وأنا لا جلادك لا خفاضك لاني خصيمك لا محاميك
أنا زول هداهو الخوف ونار الغيرة
وغاية املو يحافظ ديمه عليك
وأنا لا محكمتك لاقاضيك
لاك أنت العاصي الملحد لاني ملاكك شان أهديك واستغفر ليك
لاك أنت الطايع العاقل لاني أبليسك شان اغويك
وانا لاني مليكك لا مملكتك انا زول بالشوق انا ملك ايديك
وانا ماطاوعت قليبا رادك علشان بالشوق والريد أعصيك
وماسويتلك شوقي جبال عشان ما أهد الدنيا عليك
وما أنصفتك انا بالريده عشان ما ارجع اجني عليك
وأنا لا محكمتك لا قاضيك
ولسع …
لسع ما اتفهمت ولا استوعبت
أحساس عاشق خيل الشوق فلتت من يدو
كلمة تجيبو وكلمة تسوقو وكلمة تبنيلو قصور في الجنة
وكلمة تهدو
ولسع
ماحسيت ولا ادركت الخوف البيسكن قلبو
لما تسوقو خطاوي اللهفة وأنت تصدو
ولسع
لسع ما اتفهمت ولا استوعبت
احساس قلبا عاشق وخيل الشوق فلتت من يدو
ولسع
لسع ما اتفهمت ولا استوعبت
الحاح قلبا فاقد شوفتك وديمه غيابك انت أجابتو وردو
وياخي براءه
براءه وباطلة الدعوى وكل كلام أنا قلتو سحبتو
براءه وقلبي اتنازل
براءه ورفعت هذي الجلسة
ماعشان بالمنطق قدرت علي قليبي وأقنعتو
بس
علشان ما أتعود تاني تقولي كلام وأصدق ضدو
علشان الصورة الحلوة في عينيّ ماتتشوه
ومايتهدم صرح الريد الأنا شيدتو
براءه آ زول
وقلبي اتنازل عن دعواهو وغيرتو عليك
حاول انت جميلو تردو
براءه وانا لا محكمتك لا قاضيك
خلاص أتجاوز هذا الأمر وماتتوقف عندو
براءه وليك العتبى لمن ترضى وصافي لبن
قليبي الصدّ حاول دايما تصفى معاهو
وتوصل حبل الريد بي ودو
براءه ورفعت هذي الجلسه
avatar
shoosh
عضو متطور
عضو متطور

عدد الرسائل : 120
الموقع : Saudi Arabia
العمل/الترفيه : lubricating Oil
تاريخ التسجيل : 25/12/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى