خبر عاجل: احلي ما يمكن ان يقدمه المساء اليوم هو(انتصار) الهلال

اذهب الى الأسفل

خبر عاجل: احلي ما يمكن ان يقدمه المساء اليوم هو(انتصار) الهلال

مُساهمة  محمد في الأحد أبريل 05 2009, 12:32

* وللصباحات (شروق) اخر .. تفاصيل (غريبة) ... النسيم اليوم يعتني اكثر (بنسماته) ... يواليها اهتماما اكبر.
* يعتني باناقته ويمنحها كل الوقت.
* اليوم الذي يكون لاعب فيه الهلال يبدأ (صباحه) من منتصف ليلة الامس ... يدخل (الصباح) وهو اغلب توهجا .. يتوهط بيننا ثم يبدأ في مغالطاتنا.
* بصم .. ما بصم .. بصم.
* هذا عن الصباح .. الذي يدخل علينا و (خيوطه) البيضاء تبعث (الطمأنينة) في النفس... تشيل من الزول رقم تلفونه عشان (تمسكل) ليه كل ما يسجل الهلال (هدف).
* والناس ... يشرطها (الضحك) من الهدف ... يدفق في ملامحهم (السمراء) .. ويطلع يتاوق من عيونهم (العسلية).
* هذا الصباح .. لا تدع (الفرحة) تفوتك ... احجز (هدفك) منذ الان... لا نقول الكمية محدودة .. ولكن نقول الطلب كبير.
* هذا الصباح شكله براه .. (كل الناس اتنين اتنين) .. ما تعاين للساعة كتير ... الكورة الساعة اربعة.
* ما تشخبط في (ذاكرتك) كتير .. بينك وبين نفسك ما تتغالط.
* حاج حسن كان يوم الهلال يكون عنده مباراة .. بجر (الضل) ويقعد فيه ويقول لينا : (افتحوا لي الراديو .. شوف لي التلفزيون.. جيبوا لي الجرايد).
* يا حاج الكورة بدري عليها ..ما تبقي لينا زي مراقب المباراة.
* كان هو بشيل كلامنا .. ويدخل في (ضفورو) ما يطلع إلا مع المباراة.
* حاج حسن شائل هم الهلال.
* هذا الصباح .. فتحتو علي اثير نافذة الهلال .. لقيت الناس ما عندهم (شغلة) غير الهلال.
* الهلال هو البتكلموا بيه .. بتونسوا بيه .. بشيلوا بيه (الفرح).
* الزول يقدم صاحبو ويصل معاه للباب .. عشان يقول ليه بعد ما يزحلق الجماعة .. (يا عثمان مالي حسيت لي بي خوفة... الاكل تب غلبنا).
* ما قلتوا ثابتين.
* وعلي طريقة عبدالمولي الصديق ومن الحب ما (ارجف).
* هذا الصباح اشتري كل الجرايد .. كومها قدامك شوف رمضان كاتب شنو؟... شوف عبدالمولي (رجفتو) وصلت وين؟.
* الناس كلها الليلة بتشارك عبدالمولي في (الرجفة).
* الزول البثبت بقفل تلفونو.
* شوف عائس عامل شنو؟.. وشوف قسم خالد لسع واقف ... امشي لي خالد عزالدين بتلقي الحاصل .. الليلة كل الناس بلتقوا في الحب.
* شوف داؤود بتلقي معرج بي (كرت) .. شوف فصاحة الرشيد بتلقي (شايت) في الظروف الصعبة دي.
* همشري القعدة بتكون غالباه .. بكون يدخل ويطلع ويدخل للنت.
* الناس كدا .. الليلة عندها هوس بالجرايد .. شجرابي بتلقي عندو الخبر اليقين .. ومعتصم محمود ناس المريخ ما بخليهم حتي في هذا اليوم.
* الجمهور بعتقد النتيجة بتطلع من الجرايد .. من ناس غبوش وعمرابي وخلف الله ابومنذر.
* الصور ذاتها الليلة بتفحصوها بتشوفوا هيثم مصطفي بعاين وين؟.. وفييرا ماشي كيف؟... مساوي بضحك .. وكاريكا ظاهر عليه في الصورة عنده قون.
* صورتو دي .. ما صورة زول ساكت.
* يا مهند اعمل لينا من الجزيرة ديك .. تحويل (هوبات) .. البلد بعدكم عدمت (الهوبة).
* قالوا ليك هنا في ازمة حادة في (الهوبات) بعد سفر الهلال .. وهذا ادي الي تزاحم في افران العيش .. وموت احمر في الطرمبات... وشح ادوية في الصيدليات.
* هذا الصباح .. في (الشاي) اسكت كب ..(القهوة) ما تشاكل ليها .. بتجيك في حتتك.
* القهوة ذاتها تدخل .. وتطلع.
* التوقيت هذا يوافق بالضبط كدا .. منتصف النهار ... الليلة مالها مسخنة كدا .. (النسيم) اعتذر في لطف .. انشغل عننا بالهلال .. او انشغلنا نحن منه بالهلال.
* البلد سخنت... والنهار ماشي زي بص الجريف.
* اسمع انت الكورة قلت لي الساعة كم؟.
* الساعة اربعة.
* الساعة اربعة يعني كم؟.
* يعني اربعة يا حاج... دي عاوزة ليها شرح كمان.
* كدي شغل لينا (اغنية) .. قالوا وردي في مثل هذا اليوم مريح للاعصاب.
* وردي دا عندو اغنية متل (كورية الليمون) .. تقطع العطش .. تسمعها تحس انك شربت البحر.
* يا ابو الشباب الكرسي ما ضيق .. لكن الليلة يمكن تحس بيه ضاق ... الحاصل شنو؟... الشارع شائل هموم الناس ومتقاسم معاهم السؤال.
* ادخل علي البيت ... سوي لينا شاي.
* سمعت الناس بتكلموا ... قالوا مهند طلع ليه (تصديق) في جزيرة ريونيون للهوبة.
* اصلو بيني وبينكم ناس جزيرة ريونيون (الهوبة) ممكن تعمل ليهم (خلعة) .. ممكن تدخلهم في حالة خطرة.
* الهوبة دي لسع ما وصلتهم.
* والناس بتكلموا .. والعيون تتمدد لتحجز كل (المسافات) بين السودان وجزيرة ريونيون .. تشغل كل (المساحات) بالهلال .. والحكي.
* الهلال اليوم .. بعد كل هذه المسافات كأنه يبيع المياه في حارة السقايين .. كيف لا وريونيون جزيرة .. تحاصرها المياه من كل جانب .. ولا تكتفي المياه بذلك الحصار الارضي .. لأن السماء ايضا يتوقع ان تصب مطرا ... ومع هذا نطالب الهلال ان يبيع الماء في تلك الحارة المائية .. او في تلك الجزيرة العائمة.
* هذا وضع يجعل مهمة الهلال صعبة .. لكن الهلال تحلي له المهمات اذا صعبت.
* ننتظر من هناك ان يأتي الهلال لنا منتصرا باذن الله وتوفيقه .. نترقب من البرنس (تمريرة) .. لا يفصلها من الهدف غير (صفارة الحكم).
* تمريرة البرنس بتنور.
* نتلهف ونشتاق لهوبة (برمائية) .. تثبت ربح بيع الماء في حارة السقايين.
* نتوقع كاريكا .. صاحب الاهداف الوسيمة والمليحة والسينمائية.
* الاهداف التي تحكي لنا عن الترجمة .. اسفل الشاشة.
* نترقب اخوان ديمبا هذا المساء .. بعد ان احتشدت صباحاتنا بالهلال وازدحمت شوارعنا بهم بعد ان تدفقت منهم الافئدة.
* نريد من الهلال اليوم ان يثبت حقه في ثقافة الانتصار خارج الارض.. نريد منهم ان يلعبوا للانتصار ...واطلبوا النصر تجدوه.
* نسأل الله فقط لهم الانتصار وتوقيت المباراة يقفز حتي قبل حلول موعده ويفرض ميقاته من ذاك (الصباح) الذي تحدثنا عنه من قبل.
* ملحوظة: باقي كم؟.
avatar
محمد
عضو أساسي** حائز علي وسام تــكــنو الفضي
عضو أساسي** حائز علي وسام تــكــنو الفضي

عدد الرسائل : 256
العمر : 30
الموقع : الخرطوم
العمل/الترفيه : طالب
تاريخ التسجيل : 15/01/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

تسلم يا احلي زول

مُساهمة  abogola في الأحد أبريل 05 2009, 20:37

قرد يونسك ولا جكسوية تزوزي بيك كدا احسن
الرجفة ما احلها في حب الزعيم سيد البلد
والله يامحمد انا برجف من الصباح والساعة4
الرجفة زادة والساعة ستة قالو العيد ولبسنا
توب كحلي جديد شديد




تسلم يا رائع الله يخليك
avatar
abogola
عضو أساسي** حائز علي وسام تــكــنو الفضي
عضو أساسي** حائز علي وسام تــكــنو الفضي

عدد الرسائل : 263
الموقع : الخرطوم .com
العمل/الترفيه : Tech _ Sports
تاريخ التسجيل : 25/11/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: خبر عاجل: احلي ما يمكن ان يقدمه المساء اليوم هو(انتصار) الهلال

مُساهمة  محمد في الإثنين أبريل 06 2009, 20:30

مبروك ياابوجله ياراقي Basketball Basketball Basketball
avatar
محمد
عضو أساسي** حائز علي وسام تــكــنو الفضي
عضو أساسي** حائز علي وسام تــكــنو الفضي

عدد الرسائل : 256
العمر : 30
الموقع : الخرطوم
العمل/الترفيه : طالب
تاريخ التسجيل : 15/01/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى